امریکا نے پاکستانیوں سمیت 7 ہزار سے زائد غیرقانونی تارکین وطن کو گرفتار کرکے ملک بدر کر دیا

امریکا نے صدر ڈونلڈ ٹرمپ کے اقتدار سنبھالنے کے بعد پہلے ہفتے میں پاکستانیوں سمیت 7 ہزار سے زائد غیرقانونی تارکین وطن کو گرفتار کرکے ملک بدر کردیا۔

ہوم لینڈ سکیورٹی کے مکحمہ کے مطابق ادارے نےغیرقانونی امیگرینٹس کے خلاف کریک ڈاؤن سےمتعلق صدر ٹرمپ کے وعدے پر عمل کیا ہے۔ 

محکمہ ہوم لینڈ سکیورٹی کا کہنا ہے کہ ٹرمپ کے عہدہ سنبھالنے کے  پہلے ہفتے میں 7 ہزار 300 غیرقانونی تارکین وطن کو گرفتار کر کے ملک بدر کر دیا گیا ہے۔ جبری بیدخل کیے گئے افراد میں سے زیادہ تر پر تشدد واقعات میں ملوث افراد تھے۔

ذرائع کے مطابق امریکا میں غیرقانونی طورپر مقیم چند پاکستانی بھی گرفتار ہوئے۔پاکستانی شہریوں کی گرفتاریاں غیرقانونی طورپر امریکی سرحد عبور کرنے پر کی گئیں۔

کیلیفورنیا میں غیرقانونی امیگرینٹ ہونے کےالزام میں گرفتار پاکستانیوں کی تعداد 10 سے کم ہے۔

یہ کارروائیاں شکاگو، سی ایٹل، اٹلانٹا، بوسٹن، لاس اینجیلس اور نیوآرلینز سمیت مختلف شہروں میں کی گئی ہیں۔

محکمہ ہوم لینڈ سکیورٹی کے مطابق صرف 27 جنوری کو 956 غیرقانونی تارکین وطن کو گرفتار کیا گیا۔ چھاپے اسکولوں اور گرجاگھروں میں بھی مارے گئے ہیں۔ ان گرفتاریوں کے ڈر سے بعض غیرقانونی تارکین وطن نے کام پر جانا اور بچوں کو اسکول بھیجنا تک چھوڑ دیا ہے۔

امریکی صدر ٹرمپ کا غیر قانونی تارکین وطن کو بے دخل کرنے کا فیصلہ

ٹرمپ حکومت نے ایک ہزار660 افغانیوں کی امریکا منتقلی کے منصوبے کو بھی معطل کر دیا ہے۔

محکمہ ہوم لینڈ سکیورٹی کا کہنا ہے کہ گرفتار افراد کی تعداد کا اندازہ اس بات سے لگایا جاسکتا ہے کہ سن 2024 میں صدر بائیڈن کے آخری سال اقتدار میں صرف 310 افراد کو گرفتار کیا گیا تھا۔

امریکا کی ہوم لینڈ سکیورٹی کی وزیر کرسٹی نوئم کا کہنا ہےکہ سڑکوں سے گند کے ڈھیر صاف کیے جائیں گے۔ 

وائٹ ہاؤس کی پریس سیکرٹری نے بریفنگ میں بتایا کہ 97فیصد ایسے افراد ڈپورٹ کیے گئے جنہیں بائیڈن دور میں بیدخلی کا حکم دیا گیا تھا۔بائیڈن دور میں قانون کی خلاف ورزی کی جارہی تھی جو، اب نہیں کی جا رہی۔

میڈیا رپورٹس کے مطابق امریکا میں ایک کروڑ 10 لاکھ امیگرینٹس قانونی حیثیت کے بغیر مقیم ہیں،قانونی حیثیت کے بغیر مقیم 14 لاکھ امیگرینٹس کو ڈیپورٹیشن حکمنامہ دیا جاچکا۔ ساڑھے 6 لاکھ سے زائد غیر شہری کرمنل پس منظر کے حامل ہیں۔

واضح رہے کہ امریکی صدر ڈونلڈ ٹرمپ نے  20 جنوری کو صدارت کا عہدہ سنبھالا تھا اور غیر قانونی تارکین وطن کو بے دخل کرنے کا اعلان کیا تھا۔