08 فروری ، 2025 
’ہم برے وقت میں کام آتے ہیں‘، شیر افضل کو صوابی جلسے میں خطاب کی دعوت نہ ملی
08 فروری ، 2025
پاکستان تحریک انصاف کی قیادت کے مابین اختلافات کی جھلک صوابی جلسے میں بھی دکھائی دی۔
جلسے میں اعظم سواتی طبعیت ناساز ہونے کے باعث شرکت نہ کرسکے۔ اس کے علاوہ شیر افضل مروت کو اسٹیج پر بیٹھنے کی جگہ ملنے میں بھی دشواری کا سامنا کرنا پڑا۔
صوابی جلسے میں شیر افضل مروت کی اچانک انٹری پر کارکنوں نے استقبال کیا تاہم انہیں خطاب کی دعوت نہ دی گئی۔
وزیراعلیٰ علی امین گنڈاپور اپنی تقریر شروع ہونے سے قبل شیر افضل مروت کو اسٹیج پر لے آئے۔
وزیر اعلیٰ نے خطاب سے قبل شیر افضل مروت کو مائیک دے دیا جس پرانہوں نے مختصر خطاب میں کہا کہ ہم برے لوگ ہیں برے وقت میں کام آتے ہیں، اچھے وقت میں ہمیں خاموش کروایا جاتا ہے۔
دوسری جانب جیونیوز سے گفتگو میں شیر افضل مروت کا کہنا تھاکہ اگر قیادت میرے آنے پر ناخوش تھی تو پہلے بتادیتی۔
انہوں نے کہا کہ بیٹھنے کیلئے مناسب جگہ ملی نا ہی خطاب کا موقع ملا، پشاور:میں صرف بانی پی ٹی آئی کی وجہ سے آیا تھا۔
ان کا کہنا تھاکہ میرے جلسے جلوس میں شرکت سے قیادت کو مسئلہ ہو تو بتادیں۔
