12 فروری ، 2025 
پی ٹی آئی رہنما زرتاج گل کے ناقابل ضمانت وارنٹ گرفتاری منسوخ
12 فروری ، 2025
اسلام آباد:پاکستان تحریک انصاف ( پی ٹی آئی) کی رہنما اور ممبر قومی اسمبلی زرتاج گل کے ناقابل ضمانت وارنٹ گرفتاری منسوخ کر دیے گئے۔
ڈسٹرکٹ اینڈ سیشن کورٹ اسلام آباد کے سول جج مبشر حسن نے متعدد بار طلبی کے باوجود عدالت میں پیش نہ ہونے پر زرتاج گل کے ناقابل ضمانت وارنٹ گرفتاری جاری کیے تھے۔
تاہم زرتاج گل ناقابل ضمانت وارنٹ گرفتاری جاری ہونے کے بعد عدالت میں پیش ہو گئیں اور ان کی جانب سے وارنٹ گرفتاری منسوخ کرنے کی درخواست دائر کی گئی۔
اس موقع پر جج مبشر حسن نے کہا کہ زرتاج گل خود عدالت میں پیش ہوئیں ہیں اس لیے ان کے وارنٹ گرفتاری منسوخ کرتا ہوں، ساتھ ہی عدالت نے زرتاج گل کے خلاف کیس کی سماعت 12 مارچ تک ملتوی کردی۔
واضح رہے کہ پی ٹی آئی رہنما زرتاج گل کے خلاف اسلام آباد کے تھانہ بارہ کہو میں مقدمہ درج ہے، تھانہ بارہ کہو کے مقدمے میں بانی پی ٹی آئی اور شاہ محمود قریشی بری ہو چکے ہیں۔
