13 فروری ، 2025 
کراچی: بغیر رجسٹریشن گاڑیوں کے سڑک پر آنے پر پابندی عائد، ڈمپرز کے اوقات بھی تبدیل
13 فروری ، 2025
کراچی: سندھ حکومت نے بغیر رجسٹریشن کی گاڑی کو سڑک پر لانے پر پابندی عائد کردی۔
کراچی میں پریس کانفرنس کرتےہوئے سینئر صوبائی وزیر شرجیل میمن نے کہا کہ لوگ شکایات کرتے تھے محکمہ ایکسائز کی جانب سے نمبر پلیٹس جاری نہیں کی جاتیں مگر ایکسائز ڈپارٹمنٹ کے پاس 80 ہزار نمبرپلیٹس ہیں جو لوگوں نے اٹھائی نہیں۔
انہوں نے کہا کہ واٹر بورڈ نے واٹر ٹینکرز کو بار کوڈز جاری کردیے ہیں جس سے گاڑی کی فٹنس چیک ہوسکے گی، ایسے واٹر ٹینکرز جو رجسٹرڈ نہیں ہیں انہیں روکا جائےگا، جن ٹینکرز پر واٹر بورڈ کا بار کوڈ نہیں ہوگا انہیں اجازت نہیں ہوگی۔
شرجیل میمن کا کہنا تھا کہ ہیوی ٹریفک کےلیے سندھ حکومت کا فٹنس سرٹیفکیٹ رکھنا لازمی ہوگا مگر ہیوی ٹریفک کو فٹنس سرٹیفکیٹ کے لیے وقت دیا گیا ہے، جو ہیوی ٹریفک دیگر صوبوں سے آرہی ہیں ان کے لیے بھی سندھ سے فٹنس سرٹیفکیٹ لینا ضروری ہے۔
صوبائی وزیر نے بتایاکہ قانون کے مطابق کوئی بھی گاڑی جب تک رجسٹر نہیں ہوگی شو روم سے باہر نہیں آسکتی، پیر تک کوئی غیر رجسٹرڈگاڑی شو روم سے باہر نکلی تو اس شوروم کو سیل کیاجائیگا اور گاڑی ضبط ہوگی جب کہ دیگر صوبوں کے لیے آنے والی امپورٹڈ گاڑیاں بھی کیرئیر میں جائیں گی۔
شرجیل میمن نے نےکہا کہ شہر میں ڈمپرز کا وقت رات 11 سے شام 6 بجے تک تھا جسے اب رات 10 بجے سے صبح 6 بجے تک کردیا گیا ہے، یہ فیصلہ عوام اور ٹرانسپورٹرز کی سہولت کے لیے کیا گیا ہے۔
واضح رہے کہ کراچی میں حالیہ ہفتوں میں ٹریفک حادثات میں اضافہ ہوا جس میں ڈمپرز اور واٹر ٹینکرز کی ٹکرز سے کئی شہری جاں بحق ہوگئے۔
