13 فروری ، 2025 
خیبر پختونخوا میں سکیورٹی فورسز کی 5 مختلف کارروائیاں، 13 خوارج ہلاک ہوگئے
13 فروری ، 2025
سکیورٹی فورسز کی خیبر پختونخوا میں 5 مختلف کارروائیوں میں 13 خوارج ہلاک ہوگئے۔
آئی ایس پی آر کے مطابق سکیورٹی فورسز نے ڈی آئی خان، شمالی وزیر ستان، لکی مروت اور ضلع خیبر میں خوارج کے خلاف کامیاب کارروائیاں کیں۔
آئی ایس پی آر کے مطابق کارروائیوں کے دوران فائرنگ کے تبادلے میں 13 خوارج ہلاک کر دیے گئے۔
سکیورٹی فورسز نے ڈی آئی خان کے علاقےکلاچی میں خفیہ اطلاعات پر آپریشن کیا، آپریشن میں سرکردہ خوارج شاہ گل عرف روحانی سمیت 5 خوارج مارے گئے۔
شمالی وزیرستان میں دوسالی اور ٹپی میں جھڑپوں میں 5 خوارج ہلاک ہوئے۔ لکی مروت میں سکیورٹی فورسز سے جھڑپ میں 2 خوارج مارے گئے۔
ضلع خیبر کے علاقے باغ میں کارروائی کے دورن ایک خوارج مارا گیا۔
آئی ایس پی آر کا کہنا ہےکہ مارے گئے خوارج سکیورٹی فورسز پر حملوں اور بے گناہ شہریوں کے قتل میں ملوث تھے، مارےگئے خوارج سے اسلحہ و گولہ بارود برآمد کیا گیا ہے۔
آئی ایس پی آر کا کہنا ہےکہ سکیورٹی فورسز ملک سے دہشت گردی کے خاتمےکے لیے پُر عزم ہیں۔
وزیراعظم شہباز شریف نے خیبرپختونخوا میں کامیاب آپریشنز پر سکیورٹی فورسز کی پذیرائی کی ہے۔
وزیراعظم نے 13 خوارج کو ہلاک کرنے پر سکیورٹی فورسز کی پیشہ ورانہ صلاحیتوں کی تعریف کرتے ہوئے کہا ہےکہ دہشت گردی کے خلاف جنگ میں پوری قوم افواج پاکستان کے شانہ بشانہ کھڑی ہے، دہشت گردی کی عفریت کے ملک سے مکمل خاتمے تک اس کے خلاف جنگ جاری رکھیں گے۔
