چیمپئنز ٹرافی: بھارتی کرکٹر ذاتی شیف اور ہیرڈریسر کے بغیر دبئی پہنچ گئے

دبئی: بھارتی کرکٹ آئی سی سی چیمپئنز ٹرافی 2025 میں شرکت کے لیے دبئی پہنچ گئی ہے۔

بھارتی ٹیم  ممبئی سے دبئی انٹرنیشنل ائیرپورٹ پہنچی ہے، دبئی ائیرپورٹ پر شائقین کرکٹ کی کافی بڑی تعداد نے ٹیم کا استقبال کیا، ائیرپورٹ اسٹاف میں شامل شائقین کرکٹ بھی کرکٹ اسٹارز کو دیکھنے اُمڈ آئے۔

خیال رہےکہ یہ ٹورنامنٹ پہلی بار 1996 کے ورلڈکپ کے بعد پاکستان کی میزبانی میں ہو رہا ہے اور شائقین کرکٹ میں خاصی دلچسپی پیدا کر رہا ہے۔

چیمپئنز ٹرافی ٹور پر کھلاڑیوں کی فیملیز کے حوالے سے بھارتی بورڈ کی نئی پالیسی پر عمل شروع

بھارتی بورڈ کی کھلاڑیوں کی فیملی پالیسی کے مطابق 45 دن سے زیادہ کے ٹور کے دوران کھلاڑیوں کے ساتھ 2 ہفتے تک فیملی رہ سکتی ہے۔

اس بار بھارتی کرکٹ ٹیم بغیر ذاتی عملے کے دبئی پہنچی ہے، کیونکہ بھارتی کرکٹ بورڈ نے حال ہی میں کھلاڑیوں کے ذاتی شیف اور  ہیئر ڈریسرز  ساتھ لے جانے پر پابندی عائد کر دی ہے، اس فیصلےکے تحت بھارتی کھلاڑیوں کو ایونٹ کے دوران دستیاب سہولیات پر انحصار کرنا ہوگا۔

تاہم ائیرپورٹ پر شائقین کرکٹ نے کرکٹرز کے ذاتی عملے کی غیر موجودگی کو ضرور محسوس کیا جو ماضی میں کرکٹ اسٹارز کے ارد گرد “ ہٹو بچو “ کی صدائیں بلند کرتے ہوئے نظر آتے رہے ہیں ۔

دبئی ائیرپورٹ پر موجود ایک مداح نے مذاقاً کہا، "اس بار بھارتی اسٹارز کا فوکس کرکٹ پر ہوگا، نہ کہ ان کے ہیئر اسٹائل پر!"

بھارتی ٹیم میں کئی بڑے اسٹارز شامل ہیں، جن میں کپتان روہت شرما، سابق کپتان ویرات کوہلی، آل راؤنڈرز ہاردک پانڈیا اور رویندرا جدیجا، جب کہ وکٹ کیپرز رشبھ پنت اور کے ایل راہول نمایاں ہیں۔ دیگر اہم کھلاڑیوں میں کلدیپ یادو، ورون چکرورتی، شریاس آئیر اور فاسٹ بولرز ارشدیپ سنگھ اور ہرشیت رانا شامل ہیں۔

بھارتی ٹیم اتوار کو آئی سی سی اکیڈمی میں دوپہر کو پریکٹس کرےگی اورکچھ پلیئرز ہوٹل میں فزیکل ٹریننگ سیشن میں حصہ لیں گے۔

بھارت کا پہلا میچ 20 فروری کو بنگلا دیش کے خلاف دبئی انٹرنیشنل کرکٹ اسٹیڈیم میں ہوگا۔ یہ مقام اس وقت منتخب کیا گیا جب بھارتی بورڈ نے پاکستان کا سفر کرنے سے انکار کر دیا۔

آئی سی سی چیمپئنز ٹرافی ایک ایسا ٹورنامنٹ ہونے جا رہا ہے جہاں نہ صرف کرکٹ کے روایتی حریف ہیڈ لائنز میں نظر آئیں گے بلکہ کھلاڑیوں کے اسٹائل اور بکھرے ہیئر اسٹائل بھی خبروں میں جگہ بناسکتے ہیں کیونکہ بھارتی بورڈ نے اسٹار کے کچھ پر ضرور کتر دیے ہیں۔

پے در پے شکست: بھارتی بورڈ کا کرکٹرز کی بیویوں کے حوالے سے ایس او پیز بنانے کا فیصلہ

بی سی سی آئی کووڈ سے پہلے کے اصول کو دوبارہ متعارف کرانے کا منصوبہ بنا رہا ہے: بھارتی میڈیا

بھارت نے چیمپئنز ٹرافی کیلئے 15 رکنی اسکواڈ کا اعلان کردیا

چیمپئنز ٹرافی میں ٹیم کی کپتانی روہت شرما کریں گے اور شبمن گل نائب کپتان ہوں گے