21 فروری ، 2025 
غزہ پٹی کےحوالے سے منصوبہ کارگر ہے تاہم اسے زبردستی مسلط نہیں کروں گا: ٹرمپ
21 فروری ، 2025
واشنگٹن: امریکی صدر ڈونلڈ ٹرمپ کا کہنا ہے کہ غزہ کے حوالے سے ان کا منصوبہ کارگر ہے لیکن وہ اس پر عمل نہیں کریں گے۔
غیر ملکی خبررساں ایجنسی کے مطابق امریکی صدر ڈونلڈ ٹرمپ نے دعویٰ کیا کہ ان کا غزہ پٹی پر قبضے کا منصوبہ ’واقعی کارگر ہے‘، لیکن انہوں نے کہا کہ وہ اسے زبردستی مسلط نہیں کریں گے۔
فاکس نیوز ریڈیو کو انٹرویو دیتے ہوئے ٹرمپ نے کہا کہ ’مجھے لگتا ہے کہ یہی وہ منصوبہ ہے جو حقیقت میں کارگرہے، لیکن میں اسے مسلط نہیں کر رہا، میں صرف اسے تجویز کر رہا ہوں۔‘
ٹرمپ نے اردن اور مصر کی جانب سے ان کی تجویز کی مخالفت پر حیرت کا اظہار کیا اور کہا کہ ہم اردن اور مصر کو سالانہ اربوں ڈالر دیتے ہیں اور مجھے ان کے ردعمل پر تھوڑی حیرت ہوئی۔
انہوں نے مزید کہا کہ اگر غزہ کے عوام کو انتخاب کا موقع دیا جائے کہ وہ غزہ میں رہنا چاہتے ہیں یا ’کسی اچھی جگہ منتقل ہونا چاہتے ہیں‘ تو وہ غزہ سے چلے جائیں گے۔
امریکی صدر ٹرمپ نے غزہ کے محل وقوع کو شاندار قرار دیتے ہوئے حیرت کا اظہار کیا کہ اسرائیل نے اسے کیوں چھوڑا۔ انہوں نے کہا کہ یہ ’ایک بہترین جگہ ہے، میں نہیں جانتا کہ اسرائیل نے یہ جگہ کیوں چھوڑی، انہوں نے ایسا کیوں کیا؟‘
خیال رہےکہ گزشتہ دنوں امریکی صدر ڈونلڈ ٹرمپ نے غزہ پر امریکا کی جانب سے قبضہ کرنےکا اعلان کیا تھا۔ ڈونلڈ ٹرمپ نے کہا تھا کہ امریکا غزہ کی پٹی پر قبضہ کرلےگا، ہم اس کے مالک ہوں گے، جس کا مقصد اس علاقے میں استحکام لانا اور ہزاروں ملازمتیں پیدا کرنا ہے۔
ٹرمپ کے اعلان پر اقوام متحدہ اور دنیا کے کئی ممالک نے غزہ سے فلسطینیوں کی بے دخلی کی مخالفت کی ہے اور دو ریاستی حل پر زور دیا ہے۔
مزید خبریں :
متحدہ عرب امارات کے ویزا سے متعلق نئی ہدایات جاری
12 گھنٹے پہلے
