اگلے جنم میں گووندا میرے شوہر نہیں ہونا چاہیے: اہلیہ سنیتا آہوجا

بالی وڈ سپر اسٹار گووندا اور ان کی اہلیہ سنیتا آہوجا کے درمیان شادی کے 37 سال بعد طلاق کی افواہیں بھارتی میڈیا کی زینت بنی ہوئی ہیں۔

گووندا اور سنیتا کے درمیان طلاق کی وجہ  سپر اسٹار کا 30سالہ مراٹھی اداکارہ سے تعلق قرار دیا گیا ہے تاہم اس حوالے سے کوئی تصدیق یا تردید سامنے نہیـں آسکی ہے۔

دوسری جانب گزشتہ ماہ  بھارتی میڈیا سے گفتگو کرتے ہوئے سنیتا آہوجا بھی اعتراف کرچکی ہیں کہ ’محبت اندھی ہوتی ہے لیکن اب آنکھیں کھل رہی ہیں‘۔

دوران گفتگو سنیتا نے گووندا سے خفگی کا اظہار کرتے ہوئے یہ بھی کہا تھا کہ میں  اگلے جنم میں گووندا کو اپنے شوہر کے طور پر نہیں دیکھنا چاہتی،  یہ بات میں گووندا کو بھی کہہ چکی ہوں کیوں کہ وہ چھٹیوں پر نہیں جاتے، میں ایک ایسی انسان ہوں جو اپنے شوہر کے ساتھ  سڑکوں پر پانی پوری کھانا چاہتی ہوں لیکن گووندا نے خود کو کام میں بہت مصروف کیا ہوا ہے، ہم کبھی ایک ساتھ فلم دیکھنے باہر بھی نہیں گئے‘۔

 سنیتا آہوجا نے کہا کہ ’ مجھے اگلے جنم میں ایک ایسے جیون ساتھی کی امید ہے جس کے ساتھ میں ایسی خوشیوں کا تجربہ کرسکوں جو کبھی میں گووندا کے ساتھ نہیں محسوس کی‘ ۔

گووندا کیلئے خواتین کی دلچسپی پر سنیتا آہوجا نے ذو معنی انداز میں کہا تھا’ دل پر پتھر رکھنا پڑتا ہے کیوں کہ کبھی یہاں لنک اپ تو کبھی وہاں لیکن وہ کام میں اتنا مصروف ہوتے تھے کہ ان کے افیئر کا وقت ہی نہیں تھا چونکہ گووندا اب کام نہیں کرتے تو اب میں غیر محفوظ ہوں کہ وہ افیئر نہ بنالے، 60 کے بعد لوگ سٹھیا جاتے ہیں‘۔

اسی انٹرویو کے دوران سنیتا آہوجانے عورتوں کو مردوں کے حوالے سے مشورہ دیتے ہوئے یہ بھی کہا تھا کہ حد سے زیادہ مردوں پر بھروسہ نہیں کرنا چاہیے کیوں کہ یہ لوگ گرگٹ ہوتے ہیں، عورت کو ایک خاص عمر کے بعد کسی پر انحصار کرنے کے بعد اپنے لیے وقت نکالنا چاہیے۔

خیال رہے کہ گووندا اور سنیتا کی شادی کو 37 سال کا عرصہ گزرچکا ہے اور جوڑے کا ایک بیٹا اور ایک بیٹی ہے، دونوں نے 1987 میں اس وقت شادی کی تھی جب گووندا بالی وڈ میں اپنی شناخت بنانے کی کوشش کر رہے تھے۔