دلچسپ و عجیب

بیوی کے تحفہ لینے سے انکار پر شوہر نے لگژری گاڑی کوڑے دان میں پھینک دی

27 فروری ، 2025

بیوی کے تحفہ لینے سے انکار پر شوہر نے لگژری گاڑی کوڑے دان میں پھینک دی — ایسا روس میں ہوا جب ایک روسی شخص کی اہلیہ نے پورشے جیسی شاندار گاڑی لینے سے انکار کیا تو سر پھرے شوہر نے گاڑی کوڑے دان میں پھینک دی__فوٹو: غیر ملکی میڈیا

کیا آپ کبھی سوچ سکتے ہیں کہ کوئی بھی شخص تحفے میں ملنے والی لگژری گاڑی لینے سے انکار کرے گا؟ اور پھر انکار پر کوئی شخص لگژری گاڑی پھینک دے گا؟

ایسا روس میں ہوا جب ایک روسی شخص کی اہلیہ نے پورشے جیسی شاندار گاڑی لینے سے انکار کیا تو سر پھرے شوہر نے گاڑی کوڑے دان میں پھینک دی۔

غیر ملکی میڈیا رپورٹس کے مطابق ماسکو کے ضلع میتیشی میں ایک شخص نے اپنی شادی بچانے کے لیے اہلیہ کو ویلنٹائن ڈے کے تحفے کے طور پر پورشے کار دی۔

ناراض اہلیہ نے مہنگی ایس یو وی پورشے کار لینے سے انکار کردیا تو شوہر نے گاڑی کو کوڑے دان میں پھینک دیا جس نے مقامی افراد کی توجہ حاصل کر لی اور حیرانی کے سمندر میں ڈوب گئے۔

رپورٹ کے مطابق مذکورہ جوڑے کے تعلقات گزشتہ کچھ عرصے سے خراب چل رہے تھے جنہیں ٹھیک کرنے کی خاطر شوہر نے 14 فروری سے چند روز قبل پرانی لگژری گاڑی خریدی جو ایک حادثے کے نتیجے میں خراب ہو گئی تھی۔

میڈیا رپورٹ کے مطابق شوہر نے گاڑی خرید کر اسے ٹھیک کروا کر 8 مارچ کو خواتین کے عالمی دن کے موقع پر اہلیہ کو دینے کا فیصلہ کیا تاہم گاڑی کی مرمت وقت سے پہلے مکمل ہوگئی تو اس نے اہلیہ کو سرپرائز دینے کا فیصلہ کیا۔

اہلیہ کے علم میں یہ بات آتے ہی اس نے اپنی توہین سمجھتے ہوئے اس گاڑی کو ویلنٹائن ڈے کے تحفے کے طور پر قبول کرنے سے انکار کر دیا تو شوہر نے بھی اس گاڑی کو ضائع کرنے کے لیے اسے کوڑے دان میں پھینک دیا۔