وہ لمحہ جب امیتابھ بچن کو گہری چوٹ لگنے کے بعد طبی طور پر مردہ قرار دیا گیا

بالی وڈ کے میگا اسٹار امیتابھ بچن کو بلاک بسٹر فلم ’قلی‘ کے سیٹ پر  گہری چوٹ لگنے کے بعد 'طبی لحاظ سے مردہ' قرار دیے جانے کا انکشاف ہوا ہے۔

بھارتی میڈیا کے مطابق امیتابھ بچن کو 1982 میں بننے والی مشہور فلم 'قلی' میں شوٹنگ کے دوران  خوفناک حادثہ پیش آیا تھا جس میں وہ شدید زخمی ہوگئے تھے۔

فلم  قلی کے ڈائریکٹر منموہن دیسائی اور رائٹر قادر خان تھے جس میں امیتابھ بچن نے ریلوے اسٹیشن پر کام کرنے والے قلی کا کردار ادا کیا تھا۔

فلم قلی کے سیٹ پر حادثہ

 افسوسناک واقعہ فلم قلی  کے سیٹ پر پیش آیا تھاجس کے بعد ماضی کی  بلاک بسٹر فلم اپنی کہانی کے ساتھ اس خوفناک حادثے کے سبب بھی یادگار بن گئی۔

بھارتی میڈیا رپورٹ کے مطابق فلم کی شوٹنگ کے دوران امیتابھ اور اداکار پونیت اسر کی لڑائی کا سین فلمایا جارہا تھا کہ اسی دوران  ایک غلط جمپ لگانے کی وجہ سے بگ بی کو  میز کا کونا لگ گیا اور وہ شدید اندرونی چوٹ کا شکار ہوگئے، انہیں اندرونی طور پر خون بہہ رہا تھا جس کے بعد انہیں اسپتال لے جایا گیا لیکن جلد ہی ان صورت حال نازک ہوگئی۔

حادثے کے بعد امیتابھ بچن کی لب کشائی

اداکار ہ و میزبان سمی گریوال کو دیے گئے انٹرویو میں  امیتابھ بچن نے اس واقعے کو یاد کرتے بتایا تھا کہ’میں کوما میں تھا، حادثے میں میری آنت پھٹ گئی تھی اور میری فوری طور پر سرجری کی گئی، اس کے 5 دن بعد مجھے ممبئی لے جایا گیا جہاں میری ایک اور سرجری کی گئی اسی وقت ڈاکٹر نے مجھے طبی لحاظ سے مردہ قرار دے دیا کیونکہ میری سانسیں رک گئی تھیں اور بی پی تقریباً صفر تک گر گیا تھا۔

جیا بچن کا انٹرویو

دوسری جانب جیا بچن نے اس خوفناک حادثے کو یاد کرتے ہوئے  اپنے ایک انٹرویو میں بتایا تھا کہ’حادثے کے بعد جب میں اسپتال پہنچی تو مجھے میرے دیور نے بتایاکہ امیتابھ کو ڈاکٹرز  نے طبی لحاظ سے مرہ قرار دے دیا ہے، میں یقین نہیں کرپارہی تھی ڈاکٹرز کہہ رہے تھے اب صرف آپ کی دعائیں ہی کام آئیں گی، اس وقت  ڈاکٹرز امیتابھ کو انجیکشن دے رہے تھے اور اسی دوران میں نے امیتابھ کے پیروں میں حرکت محسوس کی، میں چلائی اور ان کی سانسیں ایک بار پھر بحال ہوگئیںُ۔

بھارتی میڈیا کے مطابق اس کے بعد بھی بگ بی کو متعدد سرجریوں سے گزرنا پڑا جب کہ اداکار اس حادثے میں مبینہ طور پر تقریباً 75 فیصد جسمانی طاقت کھو چکے تھے اور اس وقت ان کے بیٹے ابھیشیک بچن کی عمر صرف 6 سال تھی۔