10 مارچ ، 2025 
اسلام آباد ائیرپورٹ پر بارسلونا، شارجہ اور دبئی کے مسافروں سے منشیات برآمد
10 مارچ ، 2025
ائیرپورٹس سکیورٹی فورس کے عملے نے اسلام آباد ائیر پورٹ پر کارروائیاں کرتے ہوئے مسافروں سے حشیش، ہیروئن اور کرسٹل آئس برآمد کر لیں۔
حکام کے مطابق اے ایس ایف کے عملے نے اسلام آباد سے دبئی کے مسافر اصغر علی شاہ کی جرابوں میں منشیات کی موجودگی کی نشاندہی کی اور جسمانی تلاشی پر جرابوں سے 312 گرام حشیش برآمد کی۔
اسلام آباد سے براستہ دوحہ بارسلونا کی پرواز پر سفر کررہے ایک مسافر محمد عباس انجم کے سامان سے منشیات برآمد کی گئی جو مسافر نے اپنے بیگ میں مہارت سے چھپا رکھی تھی تاہم مسافر کے سامان کی دستی تلاشی پر 5.89 کلو گرام ہیروئن برآمد کی گئی۔
تیسری کارروائی میں اسلام آباد سے شارجہ کی پرواز پر سفر کر رہے ایک مسافر عرفت اللہ کے سامان سے منشیات برآمد کی گئی جو مسافر نے اپنے بیگ کی تہہ میں نہایت مہارت سے چھپا رکھی تھی تاہم اے ایس ایف کے پیشہ ورانہ مہارت کے حامل عملے نے مسافر کے سامان سے 2.282 کلو گرام کرسٹل آئس (ہیروئن) برآمد کرکے سمگلنگ کی کوشش ناکام بنادی۔
ملزمان کو ابتدائی تفتیش کے بعد مزید قانونی کارروائی کے لیے برآمد شدہ منشیات کے ساتھ اے این ایف حکام کے حوالے کردیا گیا ہے۔
مزید خبریں :
نارووال: نماز تراویح کے دوران فائرنگ سے 3 افراد قتل
7 گھنٹے پہلے
