13 مارچ ، 2025 
کوالالمپور سے 26 خواتین سمیت 41 پاکستانی بھکاری بے دخل
13 مارچ ، 2025
ملائیشیا کے دارالحکومت کوالالمپور سے 26 خواتین سمیت 41 پاکستانی بھکاری بے دخل کردیے گئے۔
سعودی عرب، متحدہ عرب امارات، بحرین، قطر اور دیگر خلیجی ممالک میں پاکستانی بھکاریوں کے خلاف سختی، پکڑ دھکڑ اور بے دخلی کے بعد پاکستانی بھکاریوں کی اکثریت نے ملائیشیا کا رخ کرلیا۔
ملائیشیا سے بھی 3 ماہ کے دوران 26 خواتین سمیت 41 بھکاریوں کو ڈی پورٹ کیا جا چکا ہے۔ جن کے خلاف ایف آئی اے اینٹی ہیومن ٹریفکنگ سرکل کراچی میں انکوائری نمبر 304/25 درج کرکے تحقیقات کا آغاز کر دیا گیا ہے۔
ایف آئی اے ذرائع کے مطابق اس سلسلے میں اے ایچ ٹی سی لاہور میں بھی 3 کی ویریفکیشن اور 6 انکوائریز درج کی گئیں تاہم کوئی مقدمہ درج نہیں کیا گیا۔
ایف آئی اے ذرائع کے مطابق 3 ماہ کے دوران ملائیشیا سے ڈی پورٹ بھکاریوں میں زیادہ تعداد خواتین کی ہے۔
ان بھکاریوں میں سے 16 کا تعلق کشمور سے ہے جبکہ دیگر رحیم یار خان، فیصل آباد صادق آباد، لاہور اور دیگر علاقوں سے تعلق رکھتے ہیں۔ ان میں سے 21 علامہ اقبال ائیرپورٹ لاہور، 7 جناح انٹرنیشنل ائیرپورٹ کراچی 1 سیالکوٹ اور 2 بے نظیر بھٹو ائیرپورٹ اسلام اباد سے گئے۔
21 بھکاریوں نے وزٹ ویزوں پر، 9 نے ٹورسٹ ویزوں اور دیگر نے مختلف ویزوں پر ملائیشیا کا سفر کیا۔ جن میں سے 3 خواتین رخسانہ، عظیمہ مائی اور حسینہ خاتون کو مسقط میں آف لوڈ کرکے ڈی پوٹ کیا گیا جبکہ دیگر ملائیشیا میں بھیک مانگتے ہوئے پکڑے گئے۔
ان تمام بھکاریوں کو بلیک لسٹ بھی کردیا گیا ہے اور اس سلسلے میں تحقیقات جاری ہیں۔
