13 مارچ ، 2025 
سونا چھپانے کے طریقے یوٹیوب سے سیکھے، 14 کلو سونا اسمگل کرنیوالی بھارتی اداکارہ کا انکشاف
13 مارچ ، 2025
14 کلو گرام سے زائد سونے کی اسمگلنگ کے جرم میں گرفتار بھارت کی کناڈا فلموں کی اداکارہ رانیا راؤ نے دوران تفتیش انکشاف کیا ہے کہ انھوں نے سونا چھپانے کے طریقے یوٹیوب سے سیکھے۔
بھارتی میڈیا کے مطابق چند روز قبل اداکار رانیا راؤ کو 12 کروڑ56 لاکھ بھارتی روپے کی مالیت کے 14.2 کلو گرام سونا اسمگل کرنے کے الزام میں گرفتار کیا گیا تھا۔
بھارتی میڈیا کا بتانا ہے کہ دوران حراست ڈائریکٹوریٹ آف ریونیو انٹیلی جنس (ڈی آر آئی) کی جانب سے کی گئی پوچھ گچھ کے دوران رانیا راؤ نے انکشاف کیا کہ مجھے دبئی انٹرنیشنل ائیرپورٹ کے ٹرمینل 3 کے گیٹ اے سے سونا لینے کے لیے بذریعہ انٹرنیٹ کال موصول ہوئی تھیں، اس سفر سے 2 ہفتے قبل ہی غیر ملکی نمبرز سے کال آرہی تھی جس کے بعد میں نے پہلی بار سونا اسمگل کیا۔
اداکارہ نے بتایا کہ مجھے ائیرپورٹ کے ڈائننگ لاؤنج میں سفید گاؤن میں ملبوس ایک نامعلوم شخص نے دو پیکٹ دیے تھے جبکہ میں نے سونا چھپانے کا طریقہ یوٹیوب سے سیکھا‘۔
بھارتی میڈیا رپورٹ کے مطابق ائیرپورٹ پر رانیا راؤ نامعلوم شخص سے سونا لینے کے بعد اسے واش روم میں لے گئیں، بعد ازاں اداکارہ نے کپڑوں میں سونے کی سلاخیں (ٹیپ سے چپکا کر ) سونا اسمگل کرنے کی کوشش کی تھی، رانیا نے اپنے جوتوں اور جیبوں میں بھی سونے کے چھوٹے ٹکڑے چھپا رکھے تھے۔
واضح رہے کہ رانیا راؤ فلم 'مانکیا' میں کناڈا سپر اسٹار سدیپ کے مدمقابل کردار نبھانے کیلئےمشہور ہیں۔
مزید خبریں :
کینسر میں مبتلا اداکارہ انجلین ملک نے دعا کی درخواست کردی
11 مارچ ، 2025
