لاہور ائیرپورٹ پر ایک پہیےکے بغیر لینڈ کرنے والے قومی ائیرلائن کے طیارے کا لاپتا پہیہ مل گیا

کراچی: گزشتہ روز لاہور ائیرپورٹ پر ایک پہیےکے بغیر لینڈ کرنے والی قومی ائیرلائن کی پرواز پی کے 306 کا لاپتا پہیہ تلاش کرلیا گیا۔

پاکستان ائیرپورٹس اتھارٹی (پی اے اے) کے مطابق لاپتا پہیہ کراچی کے جناح انٹرنیشنل ائیرپورٹ کے ریموٹ پارکنگ بے کے پاس سے ملا۔

ویل کے طیارے سے علیحدہ ہونے کی وجہ سے کسی جانی یا مالی نقصان کے شواہد نہیں ملے، دوسری جانب پی آئی اے پرواز کی ایک پہیے کے بغیر لاہور ایئرپورٹ پر لینڈنگ کے معاملے  پر ایئر بس کمپنی نے پی آئی اے سے رابطہ کر لیا ہے۔

قومی ائیر لائن کے طیارے کا لینڈنگ کے وقت پہیہ غائب، طیارے کی ایک پہیے پر لینڈنگ

کراچی سے آنے والے طیارے کا علامہ اقبال انٹرنیشنل ائیر پورٹ پر معائنے کے دوران ایک ٹائر غائب ہونے کا پتا چلا: ذرائع

ذرائع کے مطابق ائیر بس کمپنی نے پی آئی اے کے طیارے کی ٹیکنیکل بنیادوں پر تحقیقات شروع کر دی ہیں جبکہ بورڈ آف سیفٹی انویسٹیگیشن پی آئی اے کے طیارے کی پہلے ہی تحقیقات کر رہا ہے۔

ایئر بس ساختہ 320 طیارے بنانے بنانے والی کمپنی نے پی آئی اے سے پرواز پی کے 306 کے اے پی- بی ایل ایس رجسٹریشن کے حامل ائیر بس طیارے کی مکمل رپورٹ طلب کر لی۔

ذرائع کے مطابق ائیر بس کمپنی نے طیارے کا تین ماہ کا مکمل فلائٹ ڈیٹا ریکارڈ اور چیک لسٹ بھی طلب کرلی، ایئر بس کمپنی نے مذکورہ طیارے کے لینڈنگ گیئر سمیت دیگر رپورٹ بھی مانگ لیں ہیں۔

واضح رہے کہ پرواز پی کے 306 نے بدھ کی شب لاہور ائیرپورٹ پر لینڈنگ کی تھی، لینڈنگ کے بعد طیارے کے ایک ٹائر کی عدم موجودگی کا انکشاف ہوا تھا۔

ایوی ایشن ماہرین کا کہنا ہے کہ ہر طیارے کے ٹیک آف کے بعد پی اے اے کا عملہ رن وے کا باریک بینی سے یہ جائزہ لیتا ہے کہ طیارے سے کوئی چیز نکل کر رن وے پر نہ گری ہو کیونکہ رن وے پر پڑی دھاتی یا ٹھوس اشیا ٹیک آف کرتے کسی دوسرے طیارے کیلئے انتہائی خطرناک ہو سکتی ہے لیکن پی اے اے حکام کو طیارے سے پہیہ نکلنے کا علم طیارے کے لاہور پہنچنے کے بعد ہوا۔