چین تسلط پسندی اور طاقت کی سیاست کا مخالف ہے: چینی قونصل جنرل

کراچی میں چین کے قونصل جنرل یانگ یونگ ڈونگ نے کہا ہے کہ چین تسلط پسندی اور طاقت کی سیاست کا مخالف ہے اور پاک چین تعلقات اسٹرٹیجک اہمیت کے حامل ہیں۔

چائنا 2 سیشن 2025 کے موضوع پر میڈیا بریفنگ میں قونصل جنرل کا کہنا تھا کہ چین کے گورننس نظام میں نیشنل پیپلز کانگریس اور چائنیز پیپلز پولیٹیکل کنسلٹیٹیوو کانفرنس CPPCC کا اہم کردار ہے۔

دنیا کے مختلف شعبوں میں چین کی ترقی کے حوالے سے منعقدہ ان سیشنز کے حوالے سے قونصل جنرل کا کہنا تھا کہ ان میں گورنمنٹ ورک رپورٹ کا ریویو پیش کیا گیا جس میں چین کے ماضی کے کچھ برسوں میں ترقی کے سفر اور مستقبل کے امکانات اور حکمت عملی پر بات کی گئی۔ 

ان کا کہنا تھا کہ یہ سیشن پاکستانی دوستوں کے لیے بھی ہمارے تجربات سے سیکھنے کے امکانات رکھتا ہے، چین میں توانائی سے چلنے والی گاڑیوں کی پیداوار 13 ملین سے زیادہ ہوچکی ہے۔ 

انہوں نے بتایاکہ شہری علاقوں کیلئے روزگار کے 12 ملین سے زائد مواقع فراہم کیے گئے ہیں، اناج کی پیداوار 700 ملین ٹن سے زائد ہے جو ایک سنگ میل ہے۔ 

قونصل جنرل نے بتایا کہ ڈیپ سیک کی صورت میں چین نے انتہائی کم قیمت میں بہترین کارکردگی کے ساتھ اے آئی سلوشن دیا ہے، دیہی و شہری علاقوں میں یکساں ترقی، لازمی تعلیم اور غربت کا خاتمہ معیار زندگی کے وہ ہم عنصر ہیں جس پر چین میں توجہ دی گئی ہے۔ 

چائنیز ڈپلومیسی کے حوالے سے ان کا کہنا تھا کہ چین ایک آزاد اور پرامن خارجہ پالیسی پر قائم رہے گا، چین نے تسلط اور طاقت کی سیاست کو ہمیشہ مسترد کیا ہے۔

چین پاکستان تعلقات کے حوالے سے قونصل جنرل نے بتایاکہ اس کی اسٹریٹیجک اہمیت ہے، دونوں ممالک کے تعلقات دیرپا اور ہمیشہ رہنے والے ہیں، سی پیک منصوبے میں 2025 میں مزید پیش رفت ہوگی، چین اور پاکستان کی قیادت میں اس معاملے پر بات چیت جاری رہتی ہے۔

ایک سوال پران کا کہنا تھا کہ اعلیٰ تعلیم کیلئے مزید پاکستانی نوجوانوں کو چین آنے کی دعوت دیں گے، آرٹی فیشل انٹیلی جنس، مائننگ اور زراعت کے شعبوں میں تعلیم کی فراہمی کیلئے تعاون جاری رہیگا۔