17 مارچ ، 2025 
پاکستان اور افغانستان کا مستقل فائربندی اورطورخم تجارتی گزرگاہ ہرقسم کی آمدورفت کیلئے کھولنے پر اتفاق
17 مارچ ، 2025
پاکستان اور افغانستان نے مستقل فائربندی اورطورخم تجارتی گزرگاہ ہرقسم کی آمدورفت کے لیےکھولنے پراتفاق کر لیا۔
خیبر طورخم سرحدی کشیدگی پر پاک افغان جرگہ مذاکرات میں اہم پیشرفت سامنے آئی ہے اور اس حوالے سے پاکستانی جرگہ ممبر جواد حسین نے بتایا کہ مستقل فائربندی اورطورخم تجارتی گزرگاہ ہرقسم کی آمدورفت کے لیےکھولنے پراتفاق ہو گیا ہے۔
جواد حسین نے کہا کہ مشترکہ جرگہ نے افغان فورسزکی متنازع تعمیرات کوعارضی طورپر بند کرنےپراتفاق کیا ہے، متنازع تعمیرات بند کرنےلیےافغان جرگہ نےآج شام تک کی مہلت مانگ لی ہے۔
پاکستانی جرگہ ممبر کا کہنا ہے کہ افغان جرگہ آج شام تک افغان حکام کومتنازع تعمیرات بندکرنےپراعتماد میں لےگا، متنازع تعمیرات کا مسئلہ آئندہ جوائنٹ چیمبرآف کامرس کےاجلاس تک ملتوی کرنےپراتفاق کیا ہے۔
جواد حسین نے بتایا کہ جےسی سی کےآئندہ اجلاس میں متنازع تعمیرات کا مستقل فیصلہ کیا جائےگا، آئندہ اجلاس تک تجارتی گزرگاہ کھول دی جائےگی، اور آئندہ اجلاس کےلیےباہمی مشاورت سےتاریخ طےپائےگی۔
انہوں نے بتایا کہ طورخم سرحد پرایف سی حکام اور افغان حکام کےدرمیان آج ملاقات ہوگی، حکام کےدرمیان ملاقات کےبعد طورخم تجارتی گزرگاہ کھولے جانے کا امکان ہے۔
یاد رہے کہ 21 فروری کو افغان فورسز پاکستانی حدود میں میں تعمیرات کر رہے تھے جس پر دونوں ممالک کے درمیان حالات کشیدہ ہوگئے اور طورخم سرحدی گزرگاہ کو ہر قسم آمدورفت کے لیے بند کر دیا گیا تھا۔
