17 مارچ ، 2025 
ایاز صادق اور وزرا نے عمران خان سے متعلقہ افراد کی ملاقات کا یقین دلادیا، عامر ڈوگر
17 مارچ ، 2025
اسپیکر قومی اسمبلی ایاز صادق سے پاکستان تحریک انصاف کے چیف وہپ عامر ڈوگر نے ملاقات کی۔
عامر ڈوگر کی وزیر قانون اعظم نذیر تارڑ اور وزیر پارلیمانی امور طارق فضل چوہدری سے بھی ملاقات ہوئی۔ عامر ڈوگر نے مطالبہ کیا کہ پارلیمنٹ کے قومی سلامتی سیشن سے پہلے بانی پی ٹی آئی سے ملاقات کرائی جائے اور 3 رکنی پارلیمانی وفد کو بانی پی ٹی آئی سے ہدایات کے لیے ملاقات کی اجازت دی جائے۔
اس حوالے سے عامر ڈوگر کا کہنا تھا کہ اسپیکر ایاز صادق اور وزرا نے متعلقہ افراد سے رابطے اور ملاقات کا یقین دلایا۔
انہوں نے کہا کہ بانی پی ٹی آئی کی سپورٹ کے بغیر کوئی کامیاب پالیسی نہیں بنائی جا سکتی، چاہتے ہیں دہشتگردی اور خارجہ پالیسی وہ بنے جسے بانی پی ٹی آئی کی حمایت حاصل ہو، دہشتگردی، ملٹری آپریشنز، خارجہ پالیسی سے متعلق بانی کا ہمیشہ واضح مؤقف رہا۔
عامر ڈوگر کا کہنا تھاکہ عدالتی احکامات کے باوجود سیاسی قیادت کی بانی پی ٹی آئی سے ملاقاتوں کو روکا جا رہا ہے، اگر ملاقات نہیں کروائی جاتی پھر بھی ہم حکومت کےلیے میدان خالی نہیں چھوڑیں گے۔
دوسری جانب اپوزیشن لیڈر عمر ایوب نے اسپیکر قومی اسمبلی ایاز صادق کو خط لکھ دیا جس میں بانی پی ٹی آئی سے ملاقات کرانے کا مطالبہ کیا۔
انہوں نے کہا کہ قومی سلامتی کمیٹی سے قبل بانی پی ٹی آئی سے مشاورت کے لیے ملاقات کروائی جائے اور ملاقات کروانے کے انتظامات کیے جائیں۔
خیال رہے کہ اسپیکر ایاز صادق نے قومی سلامتی کی پارلیمانی کمیٹی کا ان کیمرا اجلاس کل طلب کر رکھا ہے جس میں عسکری قیادت موجودہ ملکی سکیورٹی صورتحال پر بریفنگ دے گی۔
پاکستان تحریک انصاف نے بھی اجلاس میں شرکت کا فیصلہ کیا ہے۔
