لوگ انتظار کررہے ہوتے ہیں کہ ٹیم ہارے تو تنقید شروع کریں: حارث رؤف

پاکستان کرکٹ ٹیم کے فاسٹ بولر حارث رؤف کا کہنا ہے کہ لوگ انتظار کررہے ہوتے ہیں کہ ٹیم ہارے تو تنقید شروع کریں۔

حارث رؤف نے ڈونیڈن میں نیوزی لینڈ کے خلاف دوسرے ٹی ٹوئنٹی میں شکست کے بعد پریس کانفرنس کرتے ہوئے کہا کہ پاکستان ٹیم پر تنقید عام ہوچکی ہے، ہمارے ملک میں ہر بندہ کچھ بھی بات کررہا ہے، نوجوان کھلاڑیوں کو موقع دیا ہے تو پورا موقع دینا ہوگا۔

انہوں نے کہا کہ دنیا میں نوجوان کرکٹرز کو 10 سے 15 میچز کا موقع دیا جاتا ہے ، اس کے بعد ہی کوئی بڑا کرکٹر بنتا ہے، لوگ انتظار کررہے ہوتے ہیں کہ ٹیم ہارے تو تنقید شروع کریں، سب کی اپنی رائے ہے، وہ رائے دے سکتے ہیں۔

نیوزی لینڈ نے دوسرے ٹی ٹوئنٹی میں بھی پاکستان کو شکست دیدی، میچ 15 اوورز تک محدود رہا

بارش کے باعث میچ فی اننگز 15،15 اوورز پر مشتمل تھا

فاسٹ بولر نے کہا کہ ہم کوشش کررہے ہیں ٹیم کو کس طرح بنایا جائے ،  تمام سینئرز، جونیئرز کو بھرپور سپورٹ کررہے ہیں ، سب کھلاڑیوں نے محنت کی ہے ، اس گراؤنڈ پر ہائی اسکورنگ میچز ہوتے ہیں، ٹی ٹوئنٹی کرکٹ میں جس کا دن ہو اچھی کرکٹ کھیلتا ہے وہ کامیاب ہوتا ہے۔

حارث رؤف نے کہا کہ نیوزی لینڈ نے اچھی کرکٹ کھیلی ،  پاکستانی بولرز اچھی بولنگ نہیں کراسکے، کیوی بیٹرز کے کچھ شارٹ ایسے تھے جس میں ہمارے بولرزبدقسمت رہے،کیوی بیٹرز کے ٹاپ ایج لگنے پر بھی چھکے ہو رہے تھے ، ہوا اور پھر چھوٹے گراؤنڈ کی وجہ سے باہر جارہے تھے۔

انہوں نے کہا بولنگ یونٹ کوشش کررہا تھا ، نتائج ہمارے حق میں نہیں ہوئے ،  جو کیچز ہونے تھے وہ چھکے ہوگئے ، یہ تاثر غلط ہے کہ پاکستانی فاسٹ بولر ایشا کی پیچز پر مشکل میں ہیں، ایشیا میں دنیا کا جو بھی فاسٹ بولر کھیلنے گیا انہیں مشکل ہورہی تھی۔

قومی کرکٹر نے کہا دنیا کے فاسٹ بولر جب پاکستان آتے ہیں تو وہ ہم سے پوچھتے ہیں کس طرح یہاں بولنگ کرتے ہو، ہم انہیں جواب دیتے ہیں کہ کوشش کریں۔