ہول سیل بیوپاریوں کے ایڈوانس ڈیلیوری آرڈرز اور ایجنٹوں نے چینی کو کس طرح مہنگا کیا؟ ہوشربا تفصیلات

کراچی: شوگر ڈیلرز کی جانب سے شوگر ملز کے ڈیلیوری آرڈرز پر سٹہ کھیلنے کی وجہ سےچینی مہنگی ہوئی۔

ذرائع کے مطابق ملک بھر میں چینی کی گراں فروشی کے خلاف وزیراعظم کی ہدایت پر کراچی سمیت سندھ بھر میں 3 وفاقی اداروں کی مشترکہ ٹیموں کے شوگر مافیا کے خلاف بھرپور کریک ڈاؤن کی وجہ سے چینی کی قیمتوں میں نمایاں کمی ہوئی ہے۔ 

ان کاروائیوں میں شامل حساس ادارے کے ذمہ دار افسر کے مطابق ایف آئی اے، ایف بی آر اور انٹیلی جنس بیورونے شوگر مافیا کے خلاف 2 روز قبل مشترکہ کریک ڈاؤن شروع کیا اور چینی کے ہول سیل ڈیلرز کی پکڑ دھکڑ شروع کی گئی۔

ذرائع کے مطابق اس سلسلے میں کوئی باقاعدہ گرفتاری تو عمل میں نہیں آئی تاہم چھاپہ مار کارروائیوں کے دوران ہی شوگر مافیا نے گھٹنے ٹیک دیے اور فوری طور پر چینی کی قیمتوں میں کمی آنا شروع ہوئی۔ 

ذرائع نے بتایا کہ شوگر ڈیلرز کی جانب سے شوگر ملز کے ڈیلیوری آرڈرز پر سٹہ کھیلنے کی وجہ سےچینی مہنگی ہوئی تھی۔ 

ذرائع کا بتانا ہے کہ چینی کے ہول سیل بیوپاریوں نے فروری میں شوگر ملز سے ایڈوانس میں ڈیلیوری آرڈرز حاصل کر لیے تھے، چینی کے ذخائر شوگر ملوں میں رہے جب کہ ایجنٹوں نے ان ڈیلیوری آرڈرز کو کئی کئی ایجنٹوں تک فروخت کیا۔ 

ملز مالکان چینی کے 2 نرخ مقرر کرنے پر بضد، حکومت کا انکار، اجلاس کی اندرونی کہانی سامنے آگئی

شوگر ملز مالکان چینی کے 2 نرخ مقرر کرنا چاہتے ہیں مگر حکومتی ٹیم کے مطابق چینی کے 2 نرخ مقرر نہیں کر سکتے: ذرائع

ذرائع کے مطابق کسی نے فی کلوگرام 5 روپے منافع کمایا تو کسی نے 2 یا 3 روپے فی کلو رکھے، ہر ایجنٹ نے اپنا منافع رکھ کر ڈیلیوری آرڈرز آگے فروخت کیےجس کی وجہ سے چینی مارکیٹ میں آنے سے پہلے ہی مہنگی ہوچکی تھی۔ 

ذرائع نے بتایا کہ کراچی میں اجناس کی ہول سیل مارکیٹ نیوچالی یا جوڑیا بازار کے ہر ایک ہول سیلر نے ایک ماہ میں چینی کی فی کس ایک ارب روپے سے زائد کی خرید و فروخت کی۔

ذرائع کے مطابق مشترکہ کارروائیوں پر ڈیلرز نے چینی کی قیمت میں کمی کے ڈیکلریشن جمع کرائے تو چینی کی قیمت معمول پر آنا شروع ہوگئی۔ 

ذرائع نے انکشاف کیا کہ اس بحران میں شوگر ملز مالکان سے زیادہ شوگر ایجنٹس نے بھرپور فائدہ اٹھایا اور فی کس کروڑوں روپے کا دھندا کیا۔