20 مارچ ، 2025 
کوئی آپریشن نہیں ہورہا اور نہ ہی کوئی آپریشن کی بات ہوئی، طلال چوہدری
20 مارچ ، 2025
وزیر مملکت برائے داخلہ طلال چوہدری نے وزیر اعلیٰ خیبرپختونخوا کے بیان پر ردعمل دیتے ہوئے کہا ہے کہ کوئی آپریشن نہیں ہورہا اور نہ ہی کوئی آپریشن کی بات ہوئی۔
پریس کانفرنس کرتے ہوئے طلال چوہدری نے کہا کہ وزیراعلیٰ علی امین گنڈا پور نے کہا کہ کسی آپریشن کی اجازت نہیں دیں گے، وہ واضح کرنا چاہتے ہیں کہ کوئی آپریشن نہیں ہورہا اور نہ ہی کوئی آپریشن کی بات ہوئی ہے، وزیراعلیٰ کے پی کے قومی سلامتی کے اجلاس سے متعلق کنفیوژن پیدا کررہے ہیں۔
طلال چوہدری نے کہا کہ وزیراعلیٰ خیبر پختونخوا اگر دہشت گردوں کے خلاف کھڑے نہیں ہوسکتے تو ان کے دوست نہ بنیں۔
طلال چوہدری کا کہنا تھا کہ ہتھیار اٹھانے والوں سے ہتھیار کی زبان میں بات ہورہی ہے، مذاکرات تو ان سے ہوتے ہیں جن کے ہاتھ میں بندوق نہیں ہوتی۔
طلال چوہدری نےکہا کہ انٹیلیجنس اداروں کی ناکامی کی بات کرنے والے بتائیں کہ کے پی کے میں 13سال سے پی ٹی آئی کی حکومت ہے، وہاں کس کی ناکامی ہے؟
طلال چوہدری کا کہنا تھا کہ خیبرپختونخوا حکومت کو 800 ارب روپے دیے گئے 8 ارب بھی نہیں لگائے گئے۔
