بینک فراڈ کیس میں چالان جمع، ملزم کے اکاؤنٹس سے فائدہ اٹھانے والوں میں اہلیہ نادیہ کے سیلون کا اکاؤنٹ بھی شامل

وفاقی تحقیقاتی ایجنسی (ایف آئی اے) نے ملزم عاطف خان کے خلاف فراڈ کیس کا عبوری چالان عدالت میں جمع کرادیا جس میں ملزم کے بینک اکاؤئنٹس سے فائدہ اٹھانے والوں میں ملزم کی اہلیہ و اداکارہ نادیہ حسین سیلون کا اکاوئنٹ بھی شامل ہونے کا انکشاف ہوا ہے۔

ڈسٹرکٹ اینڈ سیشن جج جنوبی کی عدالت میں عاطف خان کے فراڈ کیس کی سماعت ہوئی۔ ایف آئی اے کی جانب سے کیس کا عبوری چالان جمع کرادیا گیا۔ کیس میں ایک ملزم عاطف خان گرفتار ہے جبکہ ایک ملزم فیصل محمود شیخ ضمانت پر ہے۔ 

کیس کا عبوری چالان 55 صفحات پر مشتمل ہے، ملزمان کےخلاف کمپنی فنڈ ذاتی استعمال کرنے، فراڈ اور مس کنڈکٹ سمیت متعدد الزامات ہیں، انکوائری کے دوران مختلف بینکس، ایس ای سی پی، پاکستان اسٹاک ایکسچینج و دیگر سے ریکارڈ حاصل کیا۔

چالان میں کہا گیا ہے کہ ملزم عاطف خان کے بینک اکاؤنٹس ٹرانسفر سے فائدہ اٹھانے والوں میں نادیہ حسین سیلون کا اکاؤنٹ بھی شامل ہے اور ملزم کے بینک اکاؤنٹ سے فائدہ اٹھانے والوں کو تحقیقات کیلئے بلایا جائے گا۔ 

اداکارہ نادیہ حسین کے شوہر نجی بینک میں کروڑوں کی خرد برد کے الزام میں گرفتار

تحقیقات کے دوران لگ بھگ ایک ارب سے روپے سے زائد کا غبن سامنے آیا: ایف آئی اے تحقیقات میں انکشاف

چالان کے متن کے مطابق ملزم نے کمپنی فنڈز سے خریدے گئے شیئرز سے 31.47 ملین کے ڈیویڈنڈ ذاتی بینک اکاؤنٹ میں جمع کروائے تھے اور ذاتی ٹریڈنگ کیلئے تھرڈ پارٹیز سے مختصر دورانیہ کیلئے 65 کروڑ کے فنڈز حاصل کیے تھے، ملزم نے کمپنی اکاؤنٹس کے ذریعے فنڈز مارک اپ کے ساتھ واپس کیے اور ملزم کی جانب سے کمپنی کو واجب الادا رقم 54 کروڑ روپے ہے۔ 

کمپنی کے ریکارڈ کے مطابق ملزم عاطف حسین نے ذاتی ٹریڈنگ اکاؤنٹ بنا رکھا تھا، فروری 2016 سے دسمبر 2023 تک ملزم کے اکاؤنٹ میں کمپنی سے 1.429 ارب روپے منتقل ہوئے، ملزم نے ان فنڈز کو ذاتی ٹریڈنگ کیلئے استعمال کیا، ملزم کی جانب سے 1.322 ارب روپے کمپنی اکاؤنٹ میں واپس کیے گئے اور  ملزم نے نا صرف کمپنی فنڈز کو ذاتی ٹریڈنگ میں استعمال کیا بلکہ 107 ملین روپے کا فراڈ کیا۔

ملزم کی بطور سی ای او تعیناتی کے دوران مختلف واقف کاروں کے اکاؤنٹس میں رقم منتقل کی گئی ہے۔ 

ملزمان کے خلاف عاصم واجد چیئرمین الفلاح سکیورٹیز کی شکایت پر کارروائی کی گئی ہے اور ملزم عاطف خان کو 8 مارچ 2025 کو گرفتار کیا گیا۔