26 مارچ ، 2025 
اورماڑہ کے ساحل پر پھنسنے والی نایاب ڈولفن کو ماہی گیروں نے واپس سمندر میں چھوڑدیا
26 مارچ ، 2025
اورماڑہ کے ساحل پر پھنسنے والی نایاب نسل کی ڈولفن کو ماہی گیروں نے واپس سمندر میں چھوڑدیا۔
تکنیکی مشیر ڈبلیو ڈبلیو ایف پاکستان محمد معظم خان کے مطابق اورماڑہ میں ایک نایاب قسم کی ڈولفن کو ساحل کے قریب دیکھا گیا، اس ڈولفن کو ریسو ڈولفن کہا جاتا ہے، یہ اورماڑہ ساحل پرکل صبح پھنس گئی تھی، ماہی گیروں نےڈولفن کی فوری مدد کی اور اسے محفوظ طریقے سے سمندر میں چھوڑ دیا۔
معظم خان کے مطابق یہ پاکستان کی آبی حدود میں پائی جانے والی 26 اقسام کے سمندری جانوروں میں سے ایک ہے، ریسو ڈولفن بہت موٹی ہوتی ہے، اس کا سرگول اور چپٹا ہوتا ہے، یہ ڈولفن تقریباً تمام معتدل اور گرم پانیوں میں پائی جاتی ہے۔
معظم خان کا کہنا تھا کہ یہ ڈولفن کم ازکم 1,000 فٹ کی گہرائی میں ڈائیو کرسکتی ہے اور 30 منٹ تک سانس روک سکتی ہے۔
انہوں نے مزید بتایا کہ تاریخی طورپرپاکستان سے ریسو ڈولفنز کے بارے میں صرف تین واقعات کی اطلاع ملی ہے، پاکستان میں اس کی موجودگی کی پہلی بار 2000 کی دہائی کےاوائل میں رپورٹ ہوئی،24 مارچ 2020 کو پہلی بار ایک نر ریسو ڈولفن کو کلفٹن بیچ پر پایا گیا۔
