'پیوٹن جلد مر جائیں گے'، یوکرینی صدر کی حیران کن پیشگوئی

یوکرین کے صدر ولودو میر زیلنسکی نے حیران کن پیشگوئی کہ ہے کہ روسی صدر ولادیمیر پیوٹن جلد مرجائیں گے۔

غیر ملکی میڈیا رپورٹس کے مطابق یوکرینی صدر زیلنسکی نے بدھ کو ایک انٹرویو میں پیشگوئی کی کہ پیوٹن کی صحت خراب ہورہی ہے اور وہ جلد وفات پاجائیں گے۔

یوکرینی صدر  نے  کہا کہ پیوٹن جلد مر جائیں گے، یہ ایک حقیقت ہے اور یہ سب کچھ ختم ہو جائے گا۔

زیلنسکی نے مزید کہا کہ پیوٹن اپنی موت تک اقتدار میں رہنا چاہتے ہیں اور مغرب کے ساتھ براہ راست تصادم کے خواہاں ہیں۔

رپورٹس کے مطابق یوکرینی صدر نے اس بارے میں مزید تفصیلات فراہم نہیں کیں کہ وہ کیوں سمجھتے ہیں کہ 72 سالہ روسی صدر اپنی زندگی کے اختتام کے قریب ہیں۔

واضح رہے کہ گزشتہ کئی برسوں سے پیوٹن کی صحت کے بارے میں قیاس آرائیاں کی جارہی ہیں، خاص طور پر جب سے روس نے یوکرین پر حملہ کیا۔ تاہم، کریملن نے ان افواہوں کی کئی بار تردید کی ہے اور پیوٹن کی خراب صحت کے کوئی ٹھوس شواہد سامنے نہیں آئے۔

اکتوبر میں پیوٹن کی کچھ تصاویر منظر عام پر آئی تھیں جن میں ان کے ہاتھوں پر کچھ نشانات دیکھے گئے تھے  جب وہ فوجیوں سے ملاقات کر رہے تھے، جس سے یہ قیاس آرائیاں ہوئیں کہ پیوٹن کا کینسر کا علاج ہو رہا ہے۔ تاہم، ان نشانات کی اصل وجہ واضح نہیں ہو سکی۔

اس کے علاوہ یہ بھی افواہیں پھیل چکی ہیں کہ پیوٹن کو فالج یا اعصابی بیماری پارکنسن لاحق ہو سکتی ہے۔

زیلنسکی کا پیوٹن کے حوالے سے یہ بیان ایسے وقت میں سامنے آیا  جب روس اور یوکرین کے وفد نے منگل کو سعودی عرب میں ٹرمپ انتظامیہ کے عہدیداروں کے ساتھ مذاکرات کے بعد توانائی تنصیبات پر حملےاور بحیرہ اسود میں جنگ بندی پر اتفاق کیا۔

یاد رہے کہ 2022 میں روسی انٹیلی جنس افسر نے دعویٰ کیا تھا کہ صدر  پیوٹن صرف 3 سال مزید زندہ رہیں گے کیونکہ ان میں تشخیص کیا گیا کینسر تیزی سے بڑھ رہا ہے۔

 روسی فیڈرل سکیورٹی سروس کے افسر نے دعویٰ کیا تھا کہ  پیوٹن دن با دن اپنی بینائی کھو رہے ہیں جبکہ کینسر کے وجہ سے وہ 3 سال مزید زندہ رہیں گے۔