Time 03 اپریل ، 2025
انٹرٹینمنٹ

فواد خان کی بالی وڈ اداکارہ کے ساتھ فلم کو ریلیز سے قبل مشکلات کا سامنا

فواد خان کی بالی وڈ اداکارہ کے ساتھ فلم کو ریلیز سے قبل مشکلات کا سامنا
فواد خان کی فلم کو سیاسی جماعت ایم این ایس اور شیو سینا کی مخالفت کا سامنا ہے/ فائل فوٹو

پاکستان کے معروف اداکار فواد خان 9 سال بعد بالی وڈ میں انٹری کیلئے تیار ہیں تاہم ان کی فلم ریلیز سے قبل ہی خطرے سے دوچار ہے۔

بھارتی میڈیا کے مطابق عید کے موقع پر فواد خان اور بھارتی اداکارہ وانی کپور کی آنے والی فلم ’عبیر گلال‘ کا پہلا ٹیزر جاری ہوا جس پر ان کے مداح تو خوش ہوئے لیکن یہ فلم ریلیز سے قبل ہی مشکلات سے دوچار ہے۔

میڈیا رپورٹس کے مطابق اس فلم کو سیاسی جماعت ایم این ایس اور شیو سینا کی  مخالفت کا سامنا ہے جب کہ سیاسی رہنماؤں نے ریاست مہاراشٹرا میں فلم ریلیز نہ کرنے کی دھمکی بھی دی ہے۔

اسی حوالے سے سیاسی رہنما امیہ کھوپکر کا کہنا تھا کہ  ہم فلم کو مہاراشٹرا میں ریلیز نہیں ہونے دیں گے کیوں کہ اس میں پاکستانی اداکار کی موجودگی ہے جب کہ ہم فلم کے حوالے سے مزید معلومات بھی حاصل کررہے ہیں۔

دوسری جانب ہندو انتہا پسند تنظیم شیو سینا کے رہنما سنجے نروپم نے کہا کہ جب پاکستان سے کوئی فلم ریلیز ہوتی ہے تو بھارتی اسے دیکھنا پسند نہیں کرتے، ایک منٹ میں ایک یا دو فلمیں دیکھنا الگ بات ہے لیکن پاکستانی فنکاروں کی فلمیں بھارتی شائقین میں زیادہ مقبول نہیں ہوتیں اور یہی وجہ ہے کہ پاکستانی اسٹارز کبھی بھی بھارت میں کامیاب نہیں ہوسکے۔

انہوں نے کہا کہ بھارت کے بجائے پاکستان میں ہی کام کریں، اگر حکومت کوئی پالیسی بنائے تو اس پر عملدرآمد کرنا چاہیے، میرا خیال ہے کہ پاکستانی فلموں کو بھارت میں آنے دینا چاہیے یا نہیں، یہ بھی حکومت کا فیصلہ ہونا چاہیے۔

مزید خبریں :