عمران خان ہمارے ساتھ میٹنگ میں نہیں بیٹھتا تھا، آج وہی میٹنگز میں آنے کیلئے منتیں کر رہا ہے: وزیر دفاع

وزیر دفاع خواجہ آصف نے کہا ہے کہ اپنے دور میں ہمارے ساتھ کسی میٹنگ میں نہ بیٹھنے والا عمران خان اب میٹنگز میں آنے کیلئے منتیں کر رہا ہے۔

سیالکوٹ میں تقریب سے خطاب میں خواجہ آصف کا  کہنا تھاکہ ہم نے تحریک عدم اعتماد کے ذریعے تحریک انصاف سے اقتدار حاصل کیا، جب اقتدار حاصل کیا اس وقت ہر طرف تباہی تھی،  کہا جارہا تھا ملک معاشی حالات کے باعث دیوالیہ ہوجائے گا لیکن پی ڈی ایم کے رہنماؤں نے ملکر اس ملک کیلئے امید کی کرن پیدا کی۔

انہوں نے کہا کہ کوئی سوچ نہیں سکتا تھا ملک میں بجلی سستی ہوگی، حکومتی پالیسیوں کی وجہ سے مہنگائی کی شرح میں کمی آئی، وزیر اعظم شہباز شریف کی قیادت میں ملک کو مشکل حالات سے نکالا۔

عمران خان کیلئے ریلیف حاصل کرنے کی کوششیں، امریکی پاکستانیوں کے وفد کی بانی سے اڈیالہ جیل میں ملاقات

پی ٹی آئی اور اسٹیبلشمنٹ کے درمیان بیک چینل مذاکرات دوبارہ شروع ہونے میں اب تک کوئی پیش رفت نہیں ہوسکی، پی ٹی آئی کے کچھ رہنما جو ماضی میں اسٹیبلشمنٹ کے ساتھ بات چیت کرتے رہے ہیں

عمران خان کو تنقید کا نشانہ بناتے ہوئے خواجہ آصف کا کہنا تھاکہ  پی ٹی آئی والوں نے ایک دوسرے کو چور کہنا شروع کردیا ہے، بانی پی ٹی آئی کے دور میں کرپشن عروج پر تھی، پی ٹی آئی والوں کا لیڈر بین الاقوامی چور ہے، بانی پی ٹی آئی ہمارے ساتھ میٹنگ میں نہیں بیٹھتا تھا لیکن اپنے دور میں کسی میٹنگ میں نہ بیٹھنے والا بانی پی ٹی آئی اب میٹنگز میں آنے کیلئے منتیں کر رہا ہے۔

انہوں نے کہا کہ ایسے افراد بھی پی ٹی آئی کے ساتھ ہیں جن کو گھر والے بھی ووٹ نہیں دیتے، تحریک انصاف ٹکڑوں میں تقسیم ہوچکی ہے، کل تک پی ٹی آئی والے کہتے تھے امریکی غلامی نامنظور، آج امریکا کی منتیں کرتے ہیں کہ بانی پی ٹی آئی کی رہائی کے لیے بیان دے دیں۔

خواجہ آصف کا کہنا تھاکہ بجٹ سے پہلے عوام کو خوشخبریاں سنائیں گے، شہباز شریف نے ایک سال کے اندر ناممکن کو ممکن کردکھایا، وزیر اعلیٰ مریم نواز پنجاب کی ترقی کےلیے دن رات کوشاں ہیں۔ انہوں نے کہا کہ بلوچستان اور خیبرپختونخوا میں دہشتگردی کی لہر ہے، پاک فوج کےجوان قربانیاں دیکر ملک کی حفاظت کر رہے ہیں۔