07 اپریل ، 2025 
لاہور ائیرپورٹ:کسٹمز اہلکاروں کا 3 خواتین مسافروں پر تشدد، مقدمہ درج کرواکرگرفتار کرادیا
07 اپریل ، 2025
لاہور ائیرپورٹ پر بیرون ملک سے آنے والی 3 مسافر خواتین پرکسٹمز ڈیوٹی کے تنازع پر کسٹمز کی خواتین اہلکاروں نے تشدد کیا اور مقدمہ درج کراکے مسافر خواتین کو گرفتار بھی کرادیا۔
راس الخیمہ سے نجی ائیرلائن کی پرواز کے ذریعے لاہور آنے والی تین مسافر خواتین نور فاطمہ،ثمن اورعلیشہ کو کسٹمز کی خواتین اہلکاروں نے سامان کی چیکنگ کے دوران کسٹمز ڈیوٹی کے تنازع پر تشدد کا نشانہ بنایا، اس دوران سپرنٹنڈنٹ کسٹم سمیت دیگر مرد اہلکار بھی موقع پر موجود تھے۔
ایک مسافر خاتون کوبال پکڑکر بھی گھسیٹا گیا۔ کسٹمز حکام نے مسافرخواتین پر تشدد کے بعد الٹا ان پر مقدمہ درج کرا کے انہیں گرفتار کرادیا۔
ایف آئی آر میں الزام لگایا گیا کہ خواتین کے سامان سے 24 سکیورٹی کیمرے اور انڈین ملبوسات برآمد ہوئے جنہیں تحویل میں لینے پر تینوں خواتین طیش میں آگئیں۔
عینی شاہدین کا کہنا ہےکہ کسٹمز حکام نے خود ہی طے کرلیا کہ کپڑے بھارتی ساخت کے ہیں اور پھر خواتین کو دھکے دینے شروع کردیے، ایک خاتون کو زیادہ تشدد کا نشانہ بنایا گیا۔
تینوں گرفتار خواتین کو پولیس نے لاہور کی مقامی عدالت میں پیش کیا۔ عدالت نے مقدمہ خارج کرکے خواتین کو بری کردیا۔
واقعے سے متعلق مؤقف کے لیے کسٹمز حکام سے کئی بار رابطےکی کوشش کے باوجود کسٹمز حکام نے جواب نہیں دیا۔
