ارجن کے بعد ملائیکہ کی ماضی کے اسٹار کرکٹر کیساتھ ڈیٹنگ کی افواہیں، قریبی ذرائع کا ردعمل بھی آگیا

بالی وڈ اداکارہ اور ماڈل ملائیکہ اروڑا اپنے کام کے ساتھ افیئرز کی بدولت بھی سرخیوں کی زینت بنی رہتی ہیں۔

 کچھ عرصہ قبل ملائیکہ اروڑا  کے  اپنے بوائے فرینڈ ارجن کپور سے بریک اپ پر مداح حیران رہ گئے تھے تاہم اب بھارتی میڈیا رپورٹس میں دعویٰ کیا گیا ہے کہ ملائیکہ ان دنوں ماضی کے اسٹار  سری لنکن کرکٹر کمار ا سنگاکارا کو ڈیٹ کر رہی ہیں۔

بھارتی میڈیا کے مطابق یہ افواہیں اس وقت سامنے آئیں جب  بھارت کے شہر گوہاٹی کے  باراسپارا کرکٹ اسٹیڈیم میں  راجستھان رائلز  بمقابلہ چنئی سپر کنگز کے درمیان ہونے والے میچ میں ملائیکہ کی سامنے آنے والی  تصویر نے سوشل میڈیا پر دھوم مچادی۔

سامنے آئی تصویر میں ملائیکہ کو سری لنکا کےسابق کرکٹر کماراسنگاکارا کے ساتھ خوشگوار موڈ میں میچ انجوائے کرتے دیکھا گیا جس کے بعد افواہیں سامنے آنے لگیں کہ  ملائیکہ ان دنوں کمارا سنگاکارا کو  ڈیٹ کر رہی ہیں۔

یاد رہے کہ کمارا سنگاکارا اس وقت راجستھان رائلز کے ڈائریکٹر کرکٹ کے طور پر کام کر رہے ہیں، اس سے قبل کمارا سنگاکار ا نے بطور  ہیڈ کوچ راجستھان رائلز اپنی ذمہ داری نبھائی تھیں۔

ڈیٹنگ کی افواہوں پر ملائیکہ کے قریبی ذرائع کا ردعمل 

ڈیٹنگ کی افواہیں سامنے آنے کے بعد ملائیکہ کے قریبی ذرائع کا ردعمل بھی سامنے آگیا ہے جس میں انھوں نے ملائیکہ اور سنگاکارا کی ڈیٹنگ کی خبروں کو بے بنیاد قرار دیا اور واضح کیا کہ’صرف اس لیے کہ دو لوگ ایک دوسرے کے ساتھ بیٹھے ہیں اس کا مطلب ہرگز یہ نہیں  وہ ڈیٹنگ کر رہے ہیں لہٰذا   ایسی بے بنیاد کہانیاں گھڑنا بند کر دینا چاہیے‘۔

ملائیکہ اور ارجن کا تعلق اور بریک اپ 

 ملائیکہ اور ارجن نے 2018 میں ڈیٹنگ شروع کی تھی تاہم انہوں نے اپنے تعلقات کو کئی عرصے تک چھپا کر رکھا، دونوں کے تعلق کی خبریں منظر عام پر آنے کے بعد ان کی شادی کے حوالے سے بھی افواہیں سرگرم رہیں تاہم جوڑے کی جانب سے کبھی بھی شادی کی افواہوں پر ردعمل نہیں دیا گیا تھا۔

اکتوبر 2024 میں ارجن کپور نے ملائیکہ اروڑا سے بریک اپ کی تصدیق کی تھی، اس دوران ایک تقریب میں ارجن کپور کے اسٹیج پر آنے کے بعد ملائیکہ کے نام کے نعرے لگے تھے جس پر اداکار نے کہا  تھا کہ وہ اب سنگل ہیں‘۔