16 اپریل ، 2025 
عوام کرکٹ سے محبت کرتے ہیں، جب قومی ٹیم اچھا پرفارم نہیں کرتی تو پی ایس ایل پر اثر پڑتا ہے: فہیم اشرف
16 اپریل ، 2025
کراچی: پی ایس ایل 10 کی ٹیم کوئٹہ گلیڈی ایٹرز میں شامل آل راؤنڈر فہیم اشرف نے کہا ہےکہ پاکستانی عوام کرکٹ سے محبت کرتے ہیں اور جب قومی ٹیم اچھا پرفارم نہیں کرتی تو پی ایس ایل پر اثر تو پڑتا ہے۔
کراچی میں جیو نیوز سے گفتگو کرتے ہوئے فہیم اشرف نے کہا کہ اس بار نئی ٹیم ہے، کوشش ہوگی کہ ویسا ہی پرفارم کروں جیسا ماضی میں کیا، اصل ہدف یہی ہے کہ اپنی ٹیم کو زیادہ سے زیادہ میچز جتواؤں تاکہ ٹیم فائنل تک جائے، تمام سینئر پلیئرز کی بھی یہی کوشش ہے کہ پی ایس ایل میں اچھا پرفارم کرکے فینز کی توجہ سمیٹیں۔
آل راؤنڈر نے کہا کہ ٹی ٹوئنٹی میں بولنگ سے زیادہ بیٹنگ کو انجوائے کرتا ہوں، ایسا نہیں کہ بیٹنگ کے بڑے اسکور صرف آئی پی ایل میں ہوتے ہیں ہمارے پلیئرز بھی تیز رنز کرتے ہیں۔
فہیم اشرف کا کہنا تھا کہ پی ایس ایل دنیا کی نامور لیگ اور پاکستان کا سب سے بڑا برانڈ ہے ، اس سے ہمارے پلیئرز کو مالی فائدہ ہوا اور ان کا کیرئیر بھی آگے گیا، لیگ میں ساری ٹیمیں اچھی ہیں ، آدھے ٹورنامنٹ سے قبل اندازہ نہیں لگایا جاسکتا کہ کون سی اچھی ٹیم ہے۔
انہوں نے مزید کہا کہ پاکستانی عوام کرکٹ سے محبت کرتے ہیں، جب قومی ٹیم اچھا پرفارم نہیں کرتی تو پی ایس ایل پر اثر تو پڑتا ہے، اس بار پچھلے سیزن 9 کے مقابلے میں تھوڑی کمی محسوس ہوئی ہے لیکن کراچی سب سے بڑا اسٹیڈیم ہے، یہاں 15 ہزار تماشائی بھی موجود ہوں تو اسٹیڈیم خالی لگتا ہے۔
