20 اپریل ، 2025 
کراچی کی مختلف شاہراہوں پر زہریلا پینٹ کرکے بچوں کو کھڑا کرنے کیخلاف بلال مقصود بول پڑے
20 اپریل ، 2025
پاکستان کے نامور گلوکار بلال مقصود نے شہرِ قائد کے مختلف مقامات پر زہریلے پینٹ کرکے معصوم بچوں کو دھوپ میں کھڑا کرنے کے خلاف آواز اٹھائی ہے۔
کراچی کی مشہور شاہراہوں جیسے بلوچ کالونی اور عائشہ منزل کے راؤنڈ اباؤٹ، سی ویو وغیرہ پر کچھ بچوں کو سلور اور گولڈن پینٹ کرکے کھڑا کر دیا جاتا ہے جنہیں لوگ پیسے دیتے ہیں۔
اسی حوالے سے بلال مقصود نے انسٹاگرام پر پوسٹ شیئر کی اور پاکستان کی ہیلتھ منسٹری کے نام پیغام تحریر کیا۔
گلوکار نے کہا 'آپ کو اتحاد ڈیفنس اور سی ویو پر اس طرح کے بہت سے بچے ملیں گے، ان کے چہرے پر چمکدار پینٹ لگا ہوا ہوتا ہے، جو اس گرمی میں سڑکوں پر کھڑے رہتے ہیں'۔
بلال مقصود نے لکھا 'دل دہلا دینے والی بات یہ ہے کہ پینٹ اکثر ایلومینیم پاؤڈر یا خطرناک کیمیکل سے بنایا جاتا ہے، جو کہ انتہائی نقصان دہ ہوتا ہے، دیر تک ایسے سورج کے نیچے کھڑے رہنے سے جلد کے سنگین مسائل پیدا ہو سکتے ہیں اور یہاں تک کہ جلد کا کینسر بھی ہو سکتا ہے'۔
انہوں نے کہا 'کچھ کرنے کی ضرورت ہے، براہ کرم اس پر نظرِ ثانی کریں، ان بچوں کو تعلیم دیں اور ان کی حفاظت کریں اس سے پہلے کہ بہت دیر ہو جائے'۔
گلوکار کی پوسٹ پر متعدد افراد نے کمنٹ کیا اور ان کی بات کی حمایت کی جبکہ کچھ صارفین نے بتایا کہ لاہور کے مختلف مقامات پر بھی ایسے ہی بچوں کو کھڑا کیا جاتا ہے۔
مزید خبریں :
فلم ’ جاٹ ‘ کی ریلیز کے ساتھ ہی سنی دیول مشکل میں پھنس گئے
18 اپریل ، 2025
