20 اپریل ، 2025 
اسپیکر کے پی اسمبلی کو کرپشن الزامات میں کلین چٹ دینے پر پی ٹی آئی کی احتساب کمیٹی میں اختلافات
20 اپریل ، 2025
اسپیکر خیبر پختونخوا اسمبلی بابر سلیم سواتی کو کرپشن الزامات کی تحقیقات میں کلین چٹ دینے والی انٹرنل احتساب کمیٹی میں اختلافات سامنے آگئے۔
احتساب کمیٹی کے رکن مصدق عباسی نے قاضی انور ایڈووکیٹ کی جانب سے رپورٹ پی ٹی آئی سیکرٹری جنرل سلمان اکرم راجا کو بھیجنے پر بھی اعتراض اٹھا دیا۔
قاضی انور ایڈووکیٹ نے بھی تسلیم کیا کہ تین رکنی کمیٹی کے رکن مصدق عباسی اس بات سے متفق نہیں ہیں کہ بابر سلیم سواتی نے کرپشن نہیں کی۔
انہوں نے یہ بھی تسلیم کیا کہ کمیٹی کے ایس او پیز کے مطابق رپورٹ صرف بانی پی ٹی آئی کو بھیجی جا سکتی ہے لیکن سلمان اکرم راجا نے رپورٹ مانگی تھی اس لیے انہیں بھیج دی۔
کمیٹی ذرائع کا کہنا ہے کہ کمیٹی کے دیگر دو ارکان مصدق عباسی اور شاہ فرمان دونوں ہی رپورٹ سلمان اکرم راجا کو بھیجنے پر نالاں ہیں۔
خیال رہے کہ اعظم سواتی نے اسپیکر کے پی اسمبلی بابر سلیم سواتی پر کرپشن اور اختیارات کے ناجائز استعمال کے الزامات عائد کیے تھے جس پر بابر سلیم سواتی نے خود کو احتساب کے لیے پیش کیا تھا۔
