بھارت نے پاکستانی اداکاروں کے بھی سوشل میڈیا اکاؤنٹس بلاک کرنا شروع کردیے

بھارت نے پاکستانی نیوز چینلز کے بعد پاکستانی اداکاروں کے سوشل میڈیا اکاؤنٹس بھی بلاک کرنا شروع کر دیے۔

بھارتی میڈیا کے مطابق پہلگام 'فالس فلیگ آپریشن' کے بعد بھارت میں معروف پاکستانی اداکاروں کے سوشل میڈیا اکاؤنٹس بلاک کردیے گئے ہیں۔

بھارتی میڈیا کے مطابق جن اداکاروں کے اکاؤنٹس پر بھارت میں پابندی لگائی گئی ہے ان میں اداکارہ ماہرہ خان، ہانیہ عامر، صنم سعید، سجل علی اور اداکار وگلوکار علی ظفر اور عمران عباس شامل ہیں۔

ان کے علاوہ دیگر مزید پاکستانی فنکاروں کے سوشل میڈیا اکاؤنٹس بھی بلاک کیےگئے ہیں۔

مودی سرکار سچ بتانے پر تلملاگئی، بھارت میں جیونیوز بند

بھارت میں جیونیوز سمیت پاکستان کے 16 یوٹیوب چینلز بند کردیے گئے ہیں اور ان کے مجموعی سبسکرائبرز کی تعداد 63 ملین سے زیادہ ہے

اس سے قبل گزشتہ دنوں دنیا کی سب سے بڑی جمہوریت اور آزادی اظہار کے علمبردار ہونے کے دعویدار بھارت نے پہلگام واقعے پر حقائق نشر کرنے والے پاکستان کے سب سے بڑے نیوز چینل جیونیوز سمیت پاکستان کے 16 یوٹیوب چینلز پر پابندی لگادی تھی۔

بھارتی میڈیا کے مطابق جن 16 پاکستانی یوٹیوب چینلز پر بھارت میں پابندی لگائی گئی ان میں پاکستان کا سب سے بڑا نیوز چینل جیونیوز کا یوٹیوب چینل بھی شامل ہے۔

اس کے علاوہ ڈان نیوز، سما ٹی وی، اے آر وائی نیوز، بول نیوز، رفتار، سنو اور صحافیوں کے چینلز عاصمہ شیرازی، ارشاد بھٹی، عمر چیمہ، منیب فاروق، پاکستان ریفرنس، سما اسپورٹس، عزیر کرکٹ اور رضی نامہ شامل ہیں۔

ان چینلز نے بھارت کے فالس فلیگ آپریشن سمیت دیگر جھوٹے دعوؤں کی قلعی کھول کر رکھ دی تھی جس کے بعد ان پر بھارت اور بھارتی فوج کے خلاف گمراہ کن معلومات پھیلانے کا الزام لگایا گیا ۔

صرف اتنا کہا گیا ہے کہ یہ چینلز اشتعال انگیز اور حساس مواد نشر کر رہے ہیں جب کہ پہلگام واقعے کی حقیقتیں آشکار کرنے پر بھارتی میڈیا تلملا گیا اور کہا جارہا ہےکہ مقبوضہ کشمیر میں ہوئے پہلگام واقعے پر جھوٹا اور گمراہ کن بیانیہ پیش کیا جا رہا ہے تاہم اس کی مثال پیش نہیں کی گئی۔