انٹرٹینمنٹ

فیصل قریشی بھارتی فنکاروں پربرہم، پاکستانی شہریوں کو بھی مشورہ دیدیا

08 مئی ، 2025

فیصل قریشی بھارتی فنکاروں پربرہم، پاکستانی شہریوں کو بھی مشورہ دیدیا — مقبوضہ کشمیر کے سیاحتی مقام پہلگام میں جو کچھ ہوا وہ ابھی تک ثابت نہیں ہوا اور نہ ہوگا: فیصل قریشی/ فائل فوٹو

پاکستانی اداکار فیصل قریشی نے بھارتی فنکاروں کی جانب سے آپریشن سندور کو کامیاب بنا کر پیش کرنے پر آڑے ہاتھوں لے لیا۔

سوشل میڈیا پر ایک ویڈیو شیئرکرتے ہوئے فیصل قریشی نے بھارتی فنکاروں سے مخاطب ہوکرکہا کہ بھارتی فنکاروں کی کیا بات ہے، اپنے ملک کی کامیابی پر آپ سب نے ایک جیسی ٹوئٹس کی ہیں، بہت زبردست حملہ کیا ہے، دہشتگردی ختم کرنے میں بھارت نے بڑا کمال دکھایا ہے، بات سمجھ آتی ہے ان پر پریشر ہے، اس لیے جو بھی انہیں کہا جاتا ہے وہ بیچارے چھاپ دیتے ہیں، چھاپنے سے پہلے اپنے اندر ذرا سا تو گردا رکھو، ایک بچہ شہید ہوا ہے۔

انہوں نے کہا کہ مقبوضہ کشمیر کے سیاحتی مقام پہلگام میں جو کچھ ہوا وہ ابھی تک ثابت نہیں ہوا اور نہ ہوگا، وہ پوری دنیا نے دیکھا ہے، کون سی کامیابی ملی ہے؟ تم لوگوں کے جہاز گرے ہیں، ایک بچے کو شہید کیا ہے اور لوگ بھی شہید ہوئے ہیں لیکن بچے کا بہت دکھ ہے، ہم مسلمانوں کیلئے شہادت ایک اعلیٰ مقام ہے، ایک بےگناہ بچہ مارا گیا ہے اور تم لوگ خوشیاں منارہے ہو، بھارتی اداکاروں کی ٹوئٹس دیکھ کر تکلیف ہوئی۔

انہوں نے بھارتی فنکاروں کو مخاطب کرتے ہوئے یہ بھی کہا کہ ہم اپنے ملک میں اتنے آزاد ہیں کہ ہم جو چاہتے ہیں وہ کہتے ہیں، جو نہیں چاہتے وہ نہیں کرتے اور نہ ہمیں یہ سب کچھ کہنے کیلئے کہا جاتا ہے، جو کہتے ہیں دل سے کہتے ہیں۔

فیصل قریشی نے پاکستانی عوام سے بھی کہا کہ پاکستانیوں تم لوگ بھی جاگ جاؤ، جن لوگوں کو تم فالو کرتے ہو جن کے پیچھے دیوانے ہوئے گھومتے ہو، دیکھو ان لوگوں نے کیا ٹوئٹس کی ہیں، آزادی بڑی نعمت ہے یہ بات یاد رکھنا۔