کاروبار

5 سال میں ملکی برآمدات 60 ارب ڈالر تک لے جانے کیلئے پلان تیار کرنے کی ہدایت

13 مئی ، 2025

5 سال میں ملکی برآمدات 60 ارب ڈالر تک لے جانے کیلئے پلان تیار کرنے کی ہدایت — احسن اقبال کی زیر صدارت اڑان پاکستان پروگرام کے تحت برآمدات میں اضافے کے لیے حکمت عملی کا جائزہ لینے کے حوالے سے اجلاس ہوا/ فائل فوٹو

اسلام آباد: وفاقی وزیر منصوبہ بندی احسن اقبال نے آئندہ 5 سال میں 60 ارب ڈالر برآمدات کا ہدف حاصل کرنے کےلیے بزنس پلان تیار کرنے کی ہدایت کردی۔

تفصیلات کے مطابق احسن اقبال کی زیر صدارت اڑان پاکستان پروگرام کے تحت برآمدات میں اضافے کے لیے حکمت عملی کا جائزہ لینے کے حوالے سے اجلاس ہوا جس فائیو ای فریم ورک کے پہلے ای ایکسپورٹ سے متعلق جائزہ لیا گیا۔

اجلاس میں وفاقی وزیر منصوبہ بندی نے آئندہ 5 سال میں 60 ارب ڈالر برآمدات کا ہدف حاصل کرنے کےلیے بزنس پلان تیار کرنے کی ہدایت کی۔

احسن اقبال نے وزارت منصوبہ بندی کے حکام کو ہدایت کی کہ مقامی پیداوار عالمی مارکیٹ کے رحجان کا جائزہ لیاجائے اور ایک جامع ڈیٹا مرتب کیا جائے کیونکہ جب تک ہمارے پاس درست اور واضح ڈیٹا نہیں ہوگا ہم اپنے وسائل کو ضائع کرتے رہیں گے۔

اس حوالے سے اجلاس کو بتایا گیا کہ وزارت منصوبہ بندی 8 اسٹریٹیجک کلسٹر پرکام کررہی ہےجن کی بنیاد پر پاکستان کی مستقبل میں برآمدی گروتھ کا دارومدار ہوگا۔

رپورٹ کے مطابق ان 8 اسٹریٹیجک کلسٹر میں زراعت اور زرعی مصنوعات کی برآمدات، صنعت اور مینوفیکچرنگ بشمول ٹیکسٹائل، انجینئرنگ اور فارما، خدمات کا شعبہ ، آئی ٹی و ڈیجیٹل سروسز ، معدنیات اور کان کنی، افرادی قوت کی برآمداور اوورسیز ملازمت، بلیو اکانومی کریٹو انڈسٹری جن میں میڈیا، آرٹس اور ثقافت شامل ہیں۔

رپورٹ کے مطابق ہر کلسٹرپر متعلقہ وزارت ہر پروڈکٹ کےلیے جامع بزنس پلان تیار کرے گی۔