15 مئی ، 2025 
آذربائیجان کی بھارتی جارحیت کیخلاف شاندار کامیابی پر پاکستان کو مبارکباد، واضح حمایت کا اعلان
15 مئی ، 2025
آذر بائیجان کے صدر الہام علیوف نے ایک بار پھر پاکستان کی بھرپور حمایت کا اعلان کرتے ہوئے بھارتی جارحیت کے خلاف شاندار کامیابی پر پاکستان کو مبارکباد پیش کی ہے۔
وزیراعظم شہباز شریف نے آذربائیجان کے صدر الہام علیوف سے ٹیلی فونک رابطہ کر کے پاکستان سے یکجہتی اور حمایت پر شکریہ ادا کیا اور کہا دونوں ملک ہمیشہ سچے بھائیوں کی طرح ایک دوسرے کے ساتھ کھڑے رہے ہیں، ایک بار پھر دونوں ممالک کے درمیان پائیدار دوستی کا اظہار ہوا ہے۔
وزیراعظم نے بھارتی قیادت کے حالیہ اشتعال انگیز بیانات پر تشویش کا اظہار کرتے ہوئے کہا کہ پاکستان جنگ بندی برقرار رکھنے کے لیے پرعزم ہے، پاکستان اپنی خودمختاری اور علاقائی سالمیت کا بھرپور دفاع کرے گا۔
آذربائیجان کے صدر الہام علیوف نے پاکستان اور بھارت کے درمیان جنگ بندی کا خیر مقدم کرتے ہوئے بھارتی جارحیت کے خلاف پاکستان کی شاندار کامیابی پر مبارکباد پیش کی اور برادرانہ تعلقات مزید مضبوط بنانے کے عزم کا اعادہ کیا۔
آذربائیجان کے صدر نے امن کے لیے پاکستان کی کوششوں کو سراہا اور کہا کہ پاکستان کے ساتھ برادرانہ تعلقات کو مضبوط بنانے کے لیے پرعزم ہیں، صدر الہام علیوف نے پاکستان کے دورے کی دعوت قبول کر لی۔
