16 مئی ، 2025 
شوہر نے پوڈکاسٹ انٹرویو دیکھ کر پسند کیا: تزئین حسین نے دلچسپ کہانی سنادی
16 مئی ، 2025
پاکستان کے لیجنڈری مرحوم اداکار طلعت حسین کی بیٹی اداکارہ تزئین حسین نے دوسری شادی اور شوہر سے متعلق دلچسپ تفصیلات شیئر کی ہیں۔
تزئین حسین نے کچھ روز قبل عامر سیدین سے دوسری شادی کی، اسی حوالے سے انہوں نے ایک حالیہ انٹرویو میں عامر سے ملاقات اور پھر شادی تک کے سفر کے بارے میں بات چیت کی۔
اداکارہ نے انکشاف کیا کہ ان کے دوسرے شوہر نے انہیں یوٹیوب پر ایک پوڈکاسٹ انٹرویو میں دیکھا اور دل ہار بیٹھے تھے جس کے بعد انہوں نے مشترکہ دوستوں کے ذریعے سے تزئین حسین سے ملاقات کرانے کی درخواست کی۔
ترئین کے مطابق اس طرح دونوں کی بات شروع ہوئی جس کے بعد ان کا رابطہ ایک عرصہ تک فون پر جاری رہا، دونوں نے شادی کے بندھن میں بندھنے کا فیصلہ کیا اور ایک سادہ سی تقریب میں شادی کرلی۔
یاد رہے کہ تزئین حسین کی پہلی شادی یونیورسٹی میں تعلیم حاصل کرنے کے دوران ہی ہوگئی تھی جن سے 3 بچے ہیں جو اب جوان ہوچکے ہیں جب کہ 2020 میں ان کے شوہر دل کے دورے کے باعث چل بسے تھے۔
تزئین حسین نے 20 سال بعد ڈراموں میں پھر سے کام کرنا شروع کیا اور 2023 میں ان کا ڈرامہ یونہی کافی مقبول ہوا۔
