واٹس ایپ نے اسٹیٹس شیئرنگ کے فیچر پر کام شروع کردیا

17 مئی ، 2025

واٹس ایپ نے اسٹیٹس شیئرنگ کے فیچر پر کام شروع کردیا — اس آپشن کے ذریعے صارفین یہ فیصلہ کرسکیں گے کہ کوئی بھی کانٹیکٹ ان کا اسٹیٹس شیئر کرسکتا ہے یا نہیں/ فائل فوٹو

میٹا کی زیر ملکیت دنیا کا سب سے بڑا میسجنگ پلیٹ فارم واٹس ایپ اپنے صارفین کو مزید اسٹیٹس کنٹرول دینے کی تیاری کررہا ہے۔

ٹیکنالوجی رپورٹس کے مطابق واٹس ایپ کی جانب سے صارفین کو ایک نئے فارورڈنگ ٹوگل ( بٹن ) کے ساتھ اسٹیٹس پوسٹس پر بہتر کنٹرول کرنے کا آپشن فراہم کیا جائیگا۔

یہ بھی پڑھیں

آپشن کے ذریعے صارفین یہ فیصلہ کرسکیں گے کہ کوئی بھی کانٹیکٹ ان کا اسٹیٹس شیئر کرسکتا ہے یا نہیں۔

نئے فیچر کو سب سے پہلے اینڈرائیڈ بیٹا کے ورژن 2.25.16.16 میں دیکھا گیا ہے، عالمی سطح پر اس فیچر کو آئندہ ہفتوں میں متعارف کروائے جانے کا امکان ہے۔

یہ فیچر اسٹیٹس پرائیویسی سیٹنگز میں آن ، آف سوئچ کا اضافہ کردیتا ہے، فیچر کو سوئچ آف کیے جانے کی صورت ٹوگل آپ کے کانٹیکٹس کو آپ کا اسٹیٹس آگے فارورڈ کرنے یا دوبارہ شیئر کرنے سے روک دے گا۔

واٹس ایپ کا نیا فیچر ’ اسٹیٹس فارورڈنگ ‘ کیسے کام کرے گا؟

واٹس ایپ پرائیویسی مینو کے تحت اسٹیٹس سیٹنگ کے اندر" Allow Reshare" سوئچ متعارف کرائے گا جسے آف کیے جانے کے بعد ناظرین کی اسکرینز سے فارورڈ آئیکن ہٹ جائے گا۔

اسٹیٹس فارورڈنگ کی اجازت کے ساتھ فارورڈ کی گئی کاپی میں آپ کی پرائیویسی کی حفاظت کیلئے آپ کا فون نمبر اور پروفائل کی تفصیلات پوشیدہ رہیں گی۔

دوسری جانب اس آپشن کو آن کردینے سے آپ کےکانٹیکٹس میں شامل افراد اسے اپنی چیٹس یا اسٹیٹس فیڈ میں بآسانی شیئر کر سکیں گے۔

واضح رہے کہ اب تک صارفین صرف یہ کنٹرول کر سکتے تھے کہ ان کا اسٹیٹس کون دیکھتا ہے؟ تاہم اب مخصوص اجازت کے ساتھ واٹس ایپ اسٹیٹس کو شیئر کیا جاسکتا ہے۔