19 مئی ، 2025 
3 ماہ کی مکمل ناکہ بندی کے بعد 5 امدادی ٹرک غزہ میں داخل
19 مئی ، 2025
غزہ میں تقریباً 3 ماہ کی مکمل ناکہ بندی کے بعد امدادی ٹرک آج محصور پٹی میں داخل ہوگئے۔
عرب میڈیا نے اسرائیلی حکام کا حوالہ دیتے ہوئے بتایا ہے کرم ابو سالم گزرگاہ کے ذریعے بچوں کی خوراک اور دیگر امدادی سامان لے کر 5 امدادی ٹرک غزہ میں داخل ہوئے ہیں۔
اقوام متحدہ کی جانب غزہ میں امدادی ٹرکوں کے داخلے کو مثبت پیشرفت قرار دیتے ہوئے کہا گیا ہے کہ غزہ میں جاری انسانی بحران سے نمٹنے کے لیے اس سے کہیں زیادہ امداد کے داخلے کی ضرورت ہے۔
گزشتہ ہفتے غذائی تحفظ کے ماہرین نے غزہ میں قحط کے خطرے سے خبردار کیا تھا۔
خیال رہے کہ اسرائیل نے 2 مارچ کو جنگ بندی معاہدے کی خلاف ورزی کرتے ہوئے غزہ میں کھانے پینے سمیت ہر قسم کے سامان کا داخلہ روک دیا تھا جس کے بعد وہاں غذائی بحران شدید ہوگیا تھا۔
گزشتہ روز اسرائیل نے عالمی سطح پر شدید تنقید کے بعد اعلان کیا کہ وہ غزہ میں قحط کی صورتحال سے بچنے کے لیے بنیادی خوراک کی فراہمی کی اجازت دے گا۔
اسرائیلی وزیراعظم کا کہنا ہے کہ اس بات کو یقینی بنایا جا ئے گاکہ امداد عسکریت پسندوں کے ہاتھوں میں نہ جائے، اسرائیل حماس کو امداد کی تقسیم کا کنٹرول حاصل کرنے سے روکنے لیے کارروائی کرے گا۔
