20 مئی ، 2025 
سینیٹر عرفان صدیقی نے عمران خان سے ڈیل سے متعلق خبروں کو مسترد کر دیا
20 مئی ، 2025
اسلام آباد: مسلم لیگ ن کی سینیٹر عرفان صدیقی نے بانی پی ٹی آئی عمران خان سے ڈیل سے متعلق خبروں کو مسترد کر دیا۔
سینیٹر عرفان صدیقی نے جیو نیوز سے خصوصی گفتگو کرتے ہوئے کہا ہے کہ کسی حکومتی شخصیت کا بانی پی ٹی آئی عمران خان سے رابطہ نہیں ہوا ، نہ کوئی مذاکرات ہوئےنہ کوئی پیشکش ہوئی۔
ان کا کہنا تھا کہ ایسی باتیں آئے روز ہوتی ہیں لیکن ان میں کوئی صداقت نہیں،بانی پی ٹی آئی سے ان کی اپنی ہی جماعت کے ارکان کے رابطے ہیں۔
سینیٹر عرفان صدیقی نے کہا کہ عمران خان جس جگہ پر ہیں اب مذاکرات یا پیشکش کے مرحلے گزر چکے، پی ٹی آئی کی جانب سے سیز فائر کا کہا جاتا ہے ،حکومت یا کسی ادارے کی جانب سے کوئی فائرنگ نہیں ہو رہی۔
یاد رہے کہ گزشتہ دنوں خبر سامنے آئی تھی کہ عمران خان نے شہباز شریف کی مذاکرات کی پیشکش قبول کرلی۔
باخبر ذرائع کے مطابق ایک اہم سیاسی پیشرفت میں پاکستان تحریک انصاف (پی ٹی آئی) کے بانی اور جیل میں قید سابق وزیر اعظم عمران خان نے وزیراعظم شہباز شریف کی حالیہ پیشکش کے بعد حکومت کے ساتھ بات چیت پر آمادگی ظاہر کی۔
تاہم پیر کو پھر خبر سامنے آئی کہ سیاسی حلقوں میں گردش کرتی افواہوں کے باوجود تحریک انصاف کو اب تک کسی رعایت یا ڈیل کی پیشکش نہیں کی گئی۔
