گوگل نے جیمنائی کو براہ راست کروم براؤزر کا حصہ بنا دیا

22 مئی ، 2025

گوگل نے جیمنائی کو براہ راست کروم براؤزر کا حصہ بنا دیا — یہ فیچر سب سے پہلے امریکا میں متعارف کرایا جا رہا ہے / فوٹو بشکریہ گوگل

گوگل نے اپنے مقبول ویب براؤزر کروم میں جیمنائی آرٹی فیشل انٹیلی جنس (اے آئی) ماڈل کو شامل کر دیا ہے۔

کمپنی کی جانب سے سالانہ ڈویلپر کانفرنس کے موقع پر بتایا گیا کہ اس نئی تبدیلی سے صارفین کو نئے اے آئی براؤزنگ اسسٹنٹ تک رسائی ملے گی اور کسی ویب پیج یا ٹاسک کو جلد سمجھنے میں مدد ملے گی۔

جیمنائی آئیکون کو کروم کے اوپری دائیں کونے میں شامل کیا جائے گا۔

اس آئیکون پر پر کلک کرکے آپ اے آئی اسسٹنٹ سے چیٹ شروع کر سکیں گے۔

آغاز میں اس تبدیلی کے بعد صارفین کو جیمنائی سے کسی پیج میں موجود پیچیدہ تفصیلات کی وضاحت حاصل کرنے کا موقع ملے گا۔

اسی طرح وہ تفصیلات کی سمری بھی تیار کروا سکیں گے۔

مثال کے طور پر آپ کوئی ویب پیج اوپن کرتے ہیں جس میں کھانا پکانے کی ترکیب موجود ہے تو آپ جیمنائی سے کہہ سکتے ہیں کہ اس کھانے کو کسی اور طریقے سے کیسے پکایا جاسکتا ہے۔

اسی طرح آپ جیمنائی کو دیگر مقاصد کے لیے بھی استعمال کرسکتے ہیں۔

گوگل کروم کا یہ نیا فیچر سب سے پہلے امریکا میں گوگل اے آئی پرو اور گوگل اے آئی الٹرا کے سبسکرائبرز کے لیے متعارف کرایا جا رہا ہے۔

گوگل کی جانب سے کروم میں ہی جیمنائی تک رسائی دینے کا مقصد بظاہر یہی ہے کہ لوگ چیٹ جی پی ٹی کا رخ نہ کریں بلکہ براؤزر میں اوپر موجود آئیکون پر کلک کرکے اے آئی چیٹ بوٹ کو استعمال کریں۔

کمپنی کے مطابق مستقبل میں کروم میں موجود جیمنائی اسسٹنٹ بیک وقت متعدد ٹیبز میں کام کرسکے گا، یہاں تک کہ آپ کی جانب سے مختلف ویب سائٹس پر نیوی گیشن بھی کرسکے گا۔