23 مئی ، 2025 
امریکی عدالت نے ہارورڈ یونیورسٹی میں غیرملکی طلبہ کے داخلے بند کرنیکے حکومتی فیصلے پر عمل درآمد روک دیا
23 مئی ، 2025
واشنگٹن: امریکی عدالت نے ہارورڈ یونیورسٹی میں غیرملکی طلبہ کے داخلے کے فیصلے پر عمل درآمد روک دیا۔
غیر ملکی خبررساں ایجنسی کے مطابق عدالت نے ٹرمپ انتظامیہ کے فیصلے کو عارضی طور پر روکا ہے۔
گزشتہ روز ٹرمپ انتظامیہ نے ہارورڈ یونیورسٹی کا غیر ملکی طلبا کو داخلہ دینے کا اختیار منسوخ کر دیا تھا۔
امریکا کی سیکرٹری ہوم لینڈ سکیورٹی کرسٹی نوم نے یونیورسٹی کو خط میں ٹرمپ انتظامیہ کے اقدام سے آگاہ کیا اور بتایا کہ اقدام ہوم لینڈ سکیورٹی کی یونیورسٹی میں جاری تفتیش کے لیے کیا جا رہا ہے۔
امریکی محکمہ ہوم لینڈ سکیورٹی کا کہنا تھا کہ ہارورڈ یونیورسٹی کی اسٹوڈنٹ اور وزیٹر ایکسچینج پروگرام سرٹیفیکیشن ختم ہوگئی ہے، ہارورڈ یونیورسٹی غیرملکی طلبا کو داخلہ نہیں دے سکتی اور موجودہ زیر تعلیم غیرملکی طلبا کو ٹرانسفر کرنا ہوگا۔
دوسری جانب ہارورڈ یونیورسٹی نے اس اقدام کو ’غیر قانونی‘ قرار دیتے ہوئے شدید ردعمل دیا اور کہا تھا کہ اس سے ادارے اور پورے ملک کو ’سنگین نقصان‘ پہنچے گا۔
