فیکٹ چیک: راولپنڈی کرکٹ اسٹیڈیم کے بھارتی حملے میں تباہ ہونے کے دعوے غلط ہیں

ایک کروڑ 20 لاکھ سے زائد مرتبہ دیکھی جانے والی ایک تصویر اس دعویٰ کے ساتھ شیئر کی جارہی ہے کہ مئی میں ایک بھارتی میزائل حملے کے بعد پاکستان کا راولپنڈی میں واقع کرکٹ اسٹیڈیم ملبے کا ڈھیر بن گیا ہے۔

یہ دعویٰ غلط ہے۔

دعویٰ

12 مئی کو صارف نے ایک تصویر X (سابقہ ٹوئٹر) پر پوسٹ کی جس میں دعویٰ کیا گیا کہ یہ تصویر راولپنڈی کے کرکٹ اسٹیڈیم کی ہے جو ”آپریشن سندور“ میں بھارتی میزائل حملے میں تباہ ہوا۔ اس پوسٹ کو 1 کروڑ 14 لاکھ سے زائد بار دیکھا، 14 ہزار دفعہ ری پوسٹ اور 1 لاکھ 29 ہزار بار لائک کیا گیا ہے۔

ایک اور صارف نے یہی تصویر ہندی زبان میں شیئر کرتے ہوئے دعویٰ کیا کہ بھارت نے ڈرون حملے کے ذریعے اسٹیڈیم کو تباہ کر دیا ہے۔

حقیقت

یہ تصویر راولپنڈی کرکٹ اسٹیڈیم کی نہیں ہے۔ جیو نیوز کے رپورٹر ارفع فیروز ذکی نے 15 مئی کو اسٹیڈیم کا دورہ کیا اور جیو فیکٹ چیک کو تصاویر بھیجیں جن میں اسٹیڈیم کو صحیح سالم اور بغیر کسی نقصان کے دیکھا جا سکتا ہے۔

اس کے علاوہ 19 مئی کو راولپنڈی کرکٹ اسٹیڈیم میں پاکستان سپر لیگ (پی ایس ایل) کا ایک میچ بھی منعقد ہوا جو اس بات کی تصدیق ہے کہ اسٹیڈیم کو کوئی نقصان نہیں پہنچا۔

میچ یہاں دیکھا جا سکتا ہے:

اگرچہ 9 مئی کو سی این این (CNN) کی رپورٹ میں اسٹیڈیم کے قریب ڈرون حملے کا نقصان دکھایا گیا، لیکن اسٹیڈیم خود بالکل محفوظ رہا۔

یہ بات بھی شامل کرنا ضروری ہے کہ جیو فیکٹ چیک آن لائن گردش کرتی ہوئی وائرل تصویر کے مقام کی آزادانہ طور پر تصدیق نہیں کر سکا۔

فیصلہ: یہ دعویٰ مکمل طور پر بے بنیاد ہے۔ وائرل تصویر راولپنڈی کرکٹ اسٹیڈیم کے بھارتی ڈرون حملے میں تباہ ہونے کی نہیں ہے۔

ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔ اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔