01 جون ، 2025 
امریکا نے جنگ بندی پیشکش پر حماس کے ردعمل کو ناقابل قبول قرار دیدیا
01 جون ، 2025
امریکی صدر ڈونلڈ ٹرمپ کے مشرق وسطیٰ میں خصوصی مندوب اسٹیو وٹکوف نے کہا ہےکہ جنگ بندی کی پیشکش پرحماس کا ردعمل ناقابل قبول ہے۔
غیر ملکی میڈیا کے مطابق فلسطینی مزاحمتی تنظیم حماس کی جانب سے غزہ جنگ بندی کا امریکی منصوبہ مسترد کیے جانے پر ردعمل دیتے ہوئے اسٹیو وٹکوف (Steve Witkoff) نے کہا ہے کہ جنگ بندی کی پیشکش پر حماس کا ردعمل ناقابل قبول ہے، حماس کو جنگ بندی تجویز کو قبول کرنا چاہیے۔
اس حوالےسے حماس کے سینئر عہدیدار نے کہاکہ ہم نے جنگ بندی تجویز کو مسترد نہیں کیا، جنگ بندی کی امریکی تجویزپر اسرائیل کا ردعمل متضاد ہے۔
انہوں نے کہا کہ حماس سے متعلق امریکی مندوب کا موقف غیر منصفانہ تھا، اسٹیووٹکوف کے موقف سے ظاہر ہوتاہےکہ ان کا جھکاؤ اسرائیل کی طرف ہے۔
واضح رہے حماس نے غزہ جنگ بندی کی امریکی تجاویز کے جواب میں مستقل جنگ بندی اور اسرائیلی فوج کے انخلا کی شرائط برقرار رکھی تھیں۔
