06 جون ، 2025 
بھارت میں پاکستانی ڈراموں پر پابندی لگنے سے کوئی فرق نہیں پڑتا: فرحان سعید
06 جون ، 2025
پاکستانی اداکار و گلوکار فرحان سعید نے بھارت میں پاکستانی ڈراموں پر پابندی لگائے جانے پر اپنے خیالات کا اظہار کیا ہے۔
حال ہی میں اداکار فرحان سعید اور اداکارہ کنزہ ہاشمی نے ایک پوڈ کاسٹ میں شرکت کی جہاں انہوں نے مختلف موضوعات کے ساتھ ساتھ پاک بھارت کشیدگی پر بھی بات کی۔
میزبان کی جانب سے سوال پوچھا گیا کہ آپ کے خیال میں بھارت میں پاکستانی ڈراموں پر پابندی لگانے کے بعد ڈراموں کے ویوز کم ہوں گے؟
جس کے جواب میں اداکار نے کہا کہ بلکل ایسا ہی ہے، ڈراموں کے ویوز کم ہوں گے لیکن اس سے کوئی فرق نہیں پڑتا کیونکہ ہم پہلے ہی 26 کروڑ لوگ ہیں جو ڈراموں کو پسند کرتے ہیں، ہم نے ڈراموں کو بھارتی عوام کے لیے بنانا شروع نہیں کیا۔
انہوں نے مزید کہا کہ بھارتیوں نے ہمارے ڈرامے دیکھنا شروع کیے کیونکہ ہمارے ڈراموں کا مواد اچھا تھا، وہ ہماری فلمیں نہیں دیکھتے کیونکہ وہ اچھی نہیں ہیں، یہ سب مواد سے منسلک ہے اور اچھا مواد ہمیشہ اپنی جگہ بناتا ہے۔
پوڈ کاسٹ میں موجود اداکارہ کنزہ ہاشمی نے بھی جواب دیتے ہوئے کہا کہ بھارتیوں نے چند سال پہلے ہی ہمارے ڈرامے دیکھنا شروع کیے ہیں، اس سے پہلے صرف پاکستانی ہی ڈرامے دیکھتے تھے تو اس پابندی سے ہمیں کوئی فرق نہیں پڑتا۔
