14 جون ، 2025 
اب اسرائیل نتائج بھگتنے کے مراحل میں داخل ہوچکا ہے: اعلیٰ کمانڈر پاسداران انقلاب
14 جون ، 2025
ایرانی پاسداران انقلاب کے اعلیٰ کمانڈر جنرل احمد واحدی نے کہا ہےکہ آج دشمن اسرائیل کو اپنی سنگین غلطی کا اندازہ ہوگیا ہے اور اب وہ اس کے نتائج بھگتنے کے مرحلے میں داخل ہوچکے ہیں۔
ایرانی میڈیا سے گفتگو میں جنرل واحدی نے کہا کہ تل ابیب میں وزارت دفاع، صنعتی اور فوجی مراکز بھی براہ راست ایرانی حملے کا نشانہ بنے، آپریشن میں ہمارے اہداف میں سب سے اہم نواتیم، اودا اور تل نوف کے فضائی اڈے تھے، ان فضائی اڈوں پر اسرائیلی فضائیہ کی کمانڈ اور دیگر جنگی مراکز موجود تھے۔
جنرل واحدی کے مطابق یہی اڈے ایران پر حالیہ حملے کا نقطۂ آغاز تھے، مجموعی طور پر اسرائیل پر میزائل حملوں میں 150 سے زائد اہداف کامیابی سے نشانہ بنائے گئے، اسرائیل کو سمجھ آگیا ہوگاکہ ایران پوری قوت کے ساتھ جواب دینے کی صلاحیت رکھتا ہے، آئندہ بھی ایسے جوابی اقدامات دہرائے جا سکتے ہیں۔
انہوں نے مزید کہا کہ دشمن سمجھ بیٹھا تھا کچھ فوجی مراکز کو نشانہ بنا کر ہمیں کمزور کر دے گا اور ہم خاموش رہیں گے، آج دشمن کو اپنی سنگین غلطی کا اندازہ ہوگیا ہے، اب وہ اس کے نتائج بھگتنے کے مرحلے میں داخل ہوچکے ہیں۔
دوسری جانب اقوام متحدہ میں ایرانی سفیر کا کہنا ہے کہ ایران اسرائیل کی بلااشتعال جارحیت کا سختی سے جواب دے گا۔
