14 جون ، 2025 
اسرائیلی حملوں کے بعد امریکا سے جوہری پروگرام پر مذاکرات ناقابل جواز ہے: ایران
14 جون ، 2025
ایران کے وزیر خارجہ عباس عراقچی نے کہا ہے کہ اسرائیلی حملوں کے بعد امریکا سے جوہری پروگرام پر مذاکرات ناقابل جواز ہے۔
ایرانی وزیر خارجہ عباس عراقچی نے یورپی یونین کی خارجہ پالیسی چیف سے گفتگو میں امریکی صدر کے بیانات کا حوالہ دیتے ہوئے اسرائیلی اقدامات کو امریکا کی براہ راست حمایت کا نتیجہ قرار دیا۔
ایرانی وزیرخارجہ نے کہاکہ ایسی صورتحال میں جب اسرائیل کی بربریت جاری ہے، ایران اور امریکا کے درمیان مذاکرات کا جاری رہنا ناقابل جواز ہے، ایک طرف مذاکرات اور دوسری طرف اسرائیل کو ایران کی سرزمین کو نشانہ بنانے کی اجازت دینا، یہ ایک ساتھ نہیں چل سکتا۔
ایرانی وزارت خارجہ کے ترجمان نے بھی ایک بیان میں واضح کیا کہ امریکا نے ایسا رویہ اختیار کیا جس سے بات چیت بے معنی ہو گئی۔
انہوں نے کہا کہ اسرائیلی حکومت سفارتی عمل پر اثر انداز ہونے میں کامیاب ہوگئی اور ایران پر حملہ امریکا کی اجازت کے بغیر ممکن نہیں تھا۔
یاد رہے کہ ایران اور امریکا کے درمیان جوہری پروگرام پر مذاکرات کا چھٹا دور اتوار کو مسقط میں شیڈول تھا، امریکی صدر ڈونلڈ ٹرمپ بھی ایران پر معاہدے کے لیے مسلسل دباؤ ڈال رہے ہیں اور انہوں نے چند روز قبل ایک بیان میں واضح کیا تھا کہ وہ ایران کو جوہری ہتھیار حاصل کرنے کی ہر گز اجازت نہیں دیں گے۔
