انٹرٹینمنٹ

نادیہ خان نے ہانیہ عامر سے متعلق بیان پر یوٹرن لے لیا

26 جون ، 2025

نادیہ خان نے ہانیہ عامر سے متعلق بیان پر یوٹرن لے لیا — دلجیت دوسانجھ بھی خاموش رہے اور اب جب فلم کا ٹریلر ریلیز ہوگیا ہے تو ہر جگہ ہانیہ عامر نظر آ رہی ہیں: میزبان کی گفتگو—فوٹو: اسکرین گریب

معروف ٹی وی میزبان نادیہ خان نے سپر اسٹار ہانیہ عامر سے متعلق اپنے مؤقف پر یوٹرن لے لیا۔

میزبان نادیہ خان کے شو کا ایک کلپ بھارتی پنجابی فلم ’سردار جی 3‘ کا ٹریلر ریلیز ہونے کے بعد وائرل ہورہا ہے جس میں وہ ہانیہ کو سراہ رہی ہیں، انہوں نے حیرت انگیز طور پر اپنے مؤقف کے برعکس بھارتی فلم انڈسٹری میں زبردست انٹری دینے پر ہانیہ عامر کی تعریف کی۔

نادیہ خان نے کہا کہ ہانیہ عامر اور دلجیت کی فلم کے بارے میں پاک بھارت کشیدگی کی وجہ سے یہ خبریں زیر گردش تھیں کہ ہانیہ کو فلم سے نکال کر ان کی جگہ کسی اور بھارتی اداکار کو کاسٹ کرکے فلم کو دوبارہ عکسبند کیا جائے گا لیکن اب اس طرح کی تمام تر افواہیں دم توڑ چکی ہیں کیونکہ فلم کا ٹریلر ہانیہ عامر کی موجودگی کے ساتھ ریلیز ہوا۔

اُنہوں نے کہا کہ یہ فلم بنانے والے اور اس میں کام کرنے والے سب اداکار سکھ ہیں جو کسی سے نہیں ڈرتے اور میں ان کی حکمت عملی کی تعریف کرتی ہوں کہ وہ خاموش رہے، قیاس آرائیوں کا جواب نہیں دیا اور لوگوں کو اس بات پر یقین کرنے دیا کہ ہانیہ عامر کو فلم سے نکال دیا گیا ہے۔

نادیہ خان نے مزید کہا کہ دلجیت دوسانجھ بھی خاموش رہے اور اب جب فلم کا ٹریلر ریلیز ہوگیا ہے تو ہر جگہ ہانیہ عامر نظر آ رہی ہیں۔

سوشل میڈیا پر نادیہ خان پر سخت تنقید کی جارہی ہے اور انہیں ماضی میں دیا گیا ان کا بیان یاد کروایا جارہا ہے۔

یاد رہے کہ نادیہ خان نے فلم سردار جی 3 کا ٹریلر ریلیز ہونے سے پہلے پاک بھارت کشیدگی کے دوران اپنے ایک بیان میں کہا تھا کہ ہانیہ عامر بھارت پر اپنا وقت ضائع کر رہی ہیں۔