اسلام آباد: جمعیت علمائے اسلام نے انتخابات اور مخصوص نشستوں پر الیکشن کمیشن کے موقف کی حمایت کردی۔
سپریم کورٹ میں سنی اتحاد کونسل کی مخصوص نشستوں کے کیس میں جے یو آئی (ف)کے وکیل کامران مرتضیٰ نے سپریم کورٹ میں بیان دیا کہ ان کی جماعت اس کیس میں الیکشن کمیشن کے مؤقف کو اختیار کر رہی ہے۔
جسٹس جمال مندوخیل نے سوال کیا کہ آپ کہہ رہے الیکشن کمیشن نے بالکل ٹھیک کام کیا ہے؟ اس پر کامران مرتضیٰ نے ہنستے ہوئے جواب دیا کہ جی ہاں، الیکشن کمیشن نے بالکل ٹھیک کام کیا ہے ۔
اس موقع پر جسٹس منیب اختر نے مولانا فضل الرحمان کی نیوز کانفرنس کی طرف اشارہ کرتے ہوئے کہا کہ کل ٹی وی پر ایک پریس کانفرنس چل رہی تھی، آپ کا موقف تو اس سے بالکل مختلف ہے۔