اسلام آباد ......سینیٹ میں 52 نشستوں کے انتخابات کیلئے کاغذات نامزدگی منظور اور مسترد ہونے کیخلاف اپیلیں پیر اور منگل دائر کی جائی گئیں ۔ ان انتخابات کیلئے 12 سیاسی جماعتوں اور آزاد امیدوار وں سمیت144 امیدوار میدان میں ہیں،سینیٹ انتخابات میں اگلا مرحلہ کاغذات نامزدگی مسترد یا منظور ہونے پر اپیلوں کا ہے ۔ جس کیلئے کل اور پرسوں کا دن مقرر کیا گیاہے ۔ ان اپیلوں پر فیصلے 26 اور 27 فروری کو سنائے جائینگے، امیدوار اپنا نام 28 فروری تک واپس لے سکتے ہیں ۔پولنگ 5 مارچ کو ہوگی ،اسلام آباد کی ایک جنرل اور خواتین کی نشست کیلئے پاکستان مسلم لیگ ن کے 4 ،پاکستان پیپلز پارٹی 2 اور متحدہ قومی موومنٹ کے3 امیدواروں سمیت کل 9 امیدوار میدان میں ہیں۔ فاٹا کی 4جنرل نشستوں کیلئے مسلم لیگ ن کا ایک اور 19 آزاد امیدوار حصہ لے رہے ہیں ، صوبہ پنجاب کی 7 جنرل ، خواتین کی2 اور علماء اور ٹیکنوکریٹس کی ایک ایک نشست پر 17 امیدوار میدان میں ہیں، جس میں مسلم لیگ ن کے 13 اور پیپلز پارٹی کے 4 امیدوار شامل ہیں ۔ صوبہ سندھ کی11 نشستوں کیلئے 28 امیدواروں کے کاغزات نامزدگی منظور ہوئے ۔ ان نشستوں پر پیپلز پارٹی کے 11،متحدہ قومی موومنٹ کے 14 ،مسلم لیگ فنکشنل 2 اور مسلم لیگ ن کا ایک امیدوار ہے ۔ صوبہ خیبر پختونخوا کی 7 جنرل،2-2 خواتین،علماء ٹیکنوکریٹس اور ایک اقلیتی نشست پر 34 امیدوار ہیں ۔ ان انتخابات میں تحریک انصاف پہلی مرتبہ حصہ لے رہی ہے۔ پارٹی کی جانب سے 10 امیدواروں کو میدان میں اتارا گیا ہے دیگر جماعتوں میں جمعیت علمائے اسلام ف کے5،عوامی نیشنل پارٹی کے 4، ،مسلم لیگ ن اور پیپلز پارٹی 3تین ، جماعت اسلامی اور قومی وطن پارٹی کے 2-2 اور 5 آزاد امیدوار بھی میدان میں ہیں ۔ صوبہ بلوچستان میں صوبہ کے پی کے کی طرح 12 نشستوں پر میدان مارنے کیلئے سب سے زیادہ 36 امیدوار میدان میں ہیں ۔ ان میں نیشنل پارٹی کے 9، مسلم لیگ ن کے 7، جمعیت علمائے اسلام ف کے 7، پختونخوا ملی عوامی پارٹی کے 5،بلوچستان نیشنل پارٹی کا ایک جبکہ آزاد حیثیت میں7 امیدوار الیکشن میں حصہ لے رہے ہیں۔