اسلام آباد........اپوزیشن جماعتوں نے سینیٹر رضاربانی کوچیئرمین سینیٹ کیلئے نامزد کردیا۔ اس بات کا فیصلہ اپوزیشن جماعتوں کے زرداری ہاؤس اسلام آباد میں ہونے والے اجلاس میں کیا گیا۔ اجلاس کے بعد پریس کانفرنس کرتے ہوئے عوامی نیشنل پارٹی کے سربراہ اسفندیارولی کا کہنا تھا کہ رضاربانی کو اپوزیشن جماعتوں نے اتفاق رائے سے نامزد کیا ہے، ڈپٹی چیئرمین کا عہدہ بلوچستان کے لیے چھوڑ دیا ہے، ڈپٹی چیئرمین سینیٹ کیلئے بلوچستان کے دوست خود فیصلہ کریں گے۔ انہوں نے مزید کہا کہ مولانا فضل الرحمان آصف زرداری سے ملاقات کے بعد واپس چلے گئے، وہ پارٹی سے مشاورت کے بعد کل خود بتائیں گے۔ اس موقع پر متحدہ قومی موومنٹ کے رہنما فاروق ستار کا کہنا تھا کہ آئندہ ہرقانون سازی میں یہ اتحاد قائم رکھنا ہوگا، مقامی حکومت کے نظام کےقیام پر بھی اتفاق ہوگیا ہے۔ انہوں نے کہا کہ دیہی سندھ میں پیپلزپارٹی اورشہری سندھ میں متحدہ بڑی جماعتیں ہیں، اختیارات کی نچلی سطح تک تقسیم ضروری ہے۔ مسلم لیگ ق کے رہنما کامل علی آغا نے کہا کہ اتفاق رائے سے فیصلہ کیا کہ رضا ربانی ہمارے مشترکہ امیدوار ہوں گے۔ پیپلز پارٹی کے رہنما اور سینیٹر رضاربانی کا کہنا تھا کہ آج کے اجلاس میں شریک تمام سیاسی جماعتوں کا شکر گزار ہوں، کوشش ہوگی کہ تمام سیاسی جماعتوں کے اعتماد پر پورا اتر سکوں۔