اسلام آباد .......خواجہ آصف کی کل والی تقریر پر تحریک انصاف اب تک برہم، شاہ محمود قریشی نے کہا ہے کہ خواجہ آصف اپنا رویہ درست کریں، زبان ہم بھی رکھتے ہیںاور جواب دینا بھی جانتے ہیں۔ خواجہ آصف کہتے ہیں تحریک انصاف کے ساتھ 8مہینے پرانا ادھار چکادیا اور چکانا بھی چاہیے۔ وزیر دفاع خواجہ آصف پیر کو تحریک انصاف پر ایسے گرجے برسے کہ عمران خان آج پارلیمنٹ کے مشترکہ اجلاس میں نہیں آئے۔ شاہ محمود قریشی کہتے ہیں کہ جواب دینا جانتے ہیں، نوجوان تلملا بھی رہے ہیں تاہم برد باری کا مظاہرہ کیا۔ خواجہ آصف کا کہنا ہے اگر کوئی غیر پارلیمانی لفظ کہا ہو تو معافی مانگنے کو تیار ہوں۔ وزیر دفاع کی اس گھن گرج کی بازگشت پارلیمنٹ میں آج بھی سنائی دیتی رہی، تحریک انصاف کے چیئرمین عمران خان نے تو پارلیمنٹ کا رخ کرنا بھی گوارہ نہ کیا، تحریک انصاف کے ارکان بھی بجھے بجھے سے دکھائی دیے۔ شاہ محمود قریشی کا دعویٰ ہے کہ حکومتی حلقوں نے بھی وزیر دفاع کی اس حرکت کا دفاع نہیں کیا، جو خواجہ آصف نے غیر پارلیمانی زبان استعمال کی اس کی مہذب حلقوں نے مذمت کی، حکومتی مہذب حلقوں نے، پی ٹی آئی نے بردباری کا مظاہرہ کیا، جواب دینا ہمیں بھی آتا ہے، نوجوان تلملا رہے تھے۔ خواجہ آصف تحریک انصاف کی دھلائی کرنے والے اپنے بیان پر قائم ہیں، کہتے ہیں کہ انہوں نے کوئی غیر پارلیمانی زبان استعمال نہیں کی، جو کہااندر کی آواز تھی، میرے اندر کی آوازتھی، جو عمران نے زبان استعمال کی وہ غیر مناسب تھی، کل غیر پالیمانی الفاظ استعمال نہیں کیے، اگر کیے تو معافی مانگوں گا۔ قومی اسمبلی میں قائد حزب اختلاف سید خورشید شاہ کا کہنا ہے کہ وزیر اعظم کی موجودگی میں تحریک انصاف پر جملے کسنا کرنا افسوس ناک ہے۔ امیر جماعت اسلامی سراج الحق اور سینیٹر مشاہد حسین سید سمیت کئی سیاسی رہنماؤں نے بھی خواجہ آصف کی تحریک انصاف پر چڑھائی پر ناپسندیدگی کا اظہار کیا ہے۔